BAUCAU, 24 setembru 2019 (TATOLI)—Diretór Edukasaun Munisípiu Baucau, Januario Natalino José Amaral, hateten atu hala’o polítika edukasaun ne’ebé loos no di’ak bazeia ba desizaun Ministériu Edukasaun ne’ebé define ona dekretu lei kona-ba lei ensinu nivel ida-idak nian hahú husi Ensinu Baziku to’o Ensinu Sekundáriu Jerál.

“Dekretu lei ne’ebé define oinsá ita atu hala’o edukasaun ne’e ho di’ak entaun edukasaun hahú husi kurríkulu, profesór/a sira, infraestrutura, materiais didatikus, mobiliares no mós apoiu kooperasaun husi inan-aman sira,” dehan Diretór Edukasaun Munisípiu Baucau, Januario Natalino José Amaral, ba Ajénjia TATOLI liuhusi entrevista iha nia knaar fatin, Baucau Vila Nova, tersa (24/9/2019).

Entretantu, nia hatutan, ko’alia kona-ba profesór sira lei de baze defini ona katak profesór/a sira nia kualifikasaun mínimu tenke to’o baixarelatu. Entaun, tuir nia, iha Munisípiu Baucau agora daudaun profesór/a sira hamutuk 4.400 resin mak tuir hela formasaun profesór nian para sira bele hetan diploma baxarelatu nian.

“Iha iha Munisípiu Baucau, profesór/a sira hamutuk 442 mak tuir hela formasaun ne’ebé koopera ho Ministériu Edukasaun no INFORDEPE no programa ne’e Universidade Nasionál Timor Lorosa’r (UNTL) mak hala’o hela kona-ba baxarlatu ba profesór/a sira atu nune’e sira tama ba iha kuatru kompeténsia profesór ninian,” nia hateten.

Tanba, tuir diretór ne’e esplika, polítika edukasaun nian katak profesór ne’ebé di’ak tenke iha kompeténsia haat hanesan kompeténsia tenke domina língua ofisiál Portugés no Tetun, koñesimentu tékniku profesór ida ida tenke iha koñesimentu apropriadu ba área espesializada nian, étika profisionál, no koñesimentu pedagojia ninian.

Kona-ba infraestrutura, diretór ne’e haktuir, husi eskola 240 iha Munisípiu Baucau nia parte identifika 75% kondisaun másima no kondisaun mínimu atinjr 25% tanba projetu mak limitadu. Tinan ida ne’e, sorte tanba Prezidente Autoridade Baucau ne’e fuan boot tanba nia fó énfaze makaas ne’e ba lina edukasaun ne’ebé iha tinan ne’e hetan projetu 20 resin.

“Ita hahú husi Projetu Progrsma Dezenvolvimentu Lokál (PDL) no mai iha Projetu Dezenvolvimentu Munisipál (PDM) no mós ikus ne’e bolu Programa Dezenvolvimentu Integradu Munisipál (PDIM) no iha tan projetu komunitáriu. Projeitu ida ita serbisu hamutuk ita-nia parseiru dezenvolvimentu liuliu Chirsty Sword Gusmão no JICA mós tulun ita halo eskola hanesan iha Quelicai Waitame ramata no hein atu entrega de’it,” nia heteten.

Aleinde ne’e, nia esplika, kona-ba projetu emerjénsia ne’e Ministériu Edukasaun rasik mak haree  para iha dezastre naturais ruma bele fó materiál hanesan ai, kalen, pregu, atu oinsá bele iha kooperasaun husi inan-aman atu tulun ida ne’e.

Nia dehan, kooperasaun inan-aman iha Munisípiu Baucau ne’e kuaze iha konxiénsia ne’ebé makaas tanba hanesan dezastre naturais inan-aman mak koopera malu hodi hadi’a fali eskola sira ne’ebé afetadu ba dezastre naturál.

“Se inan-aman sira mai hamutuk oinsá fó ideia no koopera malu oinsá atu didin fali eskola sira ne’ebé mak anin estragu, Ministériu Edukasaun foti mak hanesan foos sira ne’e para oinsá inan-aman sira bele te’in no han hamutuk hodi bele kontinua serbisu. Tanba, emerjénsia ne’e la iha orsamentu entaun inan-aman nia kolaborasaun importante tebes,” nia dehan.

Jornalista: Felicidade Ximenes

Editór: Rafy Belo

HAKEREK NO HATÁN

Please enter your comment!
Please enter your name here