Estudante sira hosi Eskola Ensinu Báziku Bidau, partisipa iha eventu Marsa Justisa Klimátika Iha Dili, ohin. Imajen TATOLI/Egas Cristóvão

DILI, 24 setembru 2019 (TATOLI) – Prezidente Repúblika (PR), Francisco Guterres Lú Olo preokupa hodi hato’o ninia mensajen no ezijénsia ba partisipasaun ativa ema hotu nian atu kombate alterasaun klimátika.

Tanba ne’e, iha okaziaun Marsa Justisa Klimátika iha Dili, 24 setembru, Xefe Estadu alerta katak asuntu atu kombate situasaun ne’e, importante no urjente.

Iha mensajen, Prezidente Repúblika kongratula Komisaun Organizadora ba eventu ida ne’e (Marsa Justisa Klimátika) no mós partisipante sira hotu ne’ebé fó tempu hodi hamutuk mai hatudu preokupasaun kona-ba realidade ida ne’ebé timoroan hotu labele sees, mak alterasaun klimátika!

Tuir Lú Olo katak kestaun ida ne’e mak ohin loron, kondisiona ajenda polítika internasionál.

“Ita-nia UMA BOOT – Planeta Terra, iha hela risku laran! Ita tenke hatene rona malu, liliu rona espesialista, sientista sira ne’ebé liuhosi sira-nia estudu naruk hatudu ona loloos no momoos risku boot ne’ebé ita-nia planeta hasoru hela. Ne’e duni, situasaun ida ne’e ezije intervensaun ida urjente no efikáz hodi kombate alterasaun klimátika ne’ebé ohin loron sai ona ameasa boot ida ba ita-nia moris rasik. Ita labele haluha katak ita-nia rai lokaliza iha rejiaun ida ne’ebé iha nasaun barak hosi pasífiku, illa barak, ne’ebé hetan ameasa dadauk atu lakon,” Xefe Estadu esplika.

Karik la kuidadu agora kedas, nia informa, iha risku boot ida katak nasaun ki’ik sira ne’e hetan kondisaun hodi lakon, ka mo’ut, iha tasi okos.

“Atu enfrenta dezafiu ida ne´e, ita-nia hakarak mak komunidade internasionál hametin kooperasaun efikáz ho komunidade ne´ebé vulnerável. Ita hotu nia partisipasaun ativa iha kombate ida ne’e urjente no importante tebes. Ita labele taka ita-nia matan bainhira ita hanoin ba mundu, saida mak ita hakarak rai hela ba ita-nia oan no beioan-sira. Ita hakarak rai ida buras no matak,” katak Lú Olo.

Prezidente Repúblika hameno ba timoroan sira tenke aprende respeita natureza no bele halo ida ne’e ho inisiativa kii’k sira iha atividade lor-loron nian. Pur-ezemplu, labele soe fo’er arbiru iha uma, iha komunidade no iha sidade laran ka fatin ne’ebé de’it.

“Ita tenke hateke fali ba kotuk no banati tuir ezemplu ne’ebé ita-nia beiala sira rai hela ba ita. Ezemplu ida mak tara-bandu. Afinál, karik ita análiza didi’ak ita-nia tradisaun, tara-bandu mós asaun ida hodi proteje ita-nia natureza, ita nia aihoris, balada sira no bee-matan!
Inisiativa sira hanesan ne’e hahú hosi ita ida-idak no neineik-neineik sei lori transformasaun ida ne’ebé boot ba ita-nia komportamentu rasik,” Lú Olo subliña.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here