Diretór Jerál Administrasaun no Finansa Ministériu Transporte no Komunikasaun (MTK), Deonísio de Araújo. Foto/Natalino Costa.

DILI, 24 setembru 2019 (TATOLI) – Diretór Jerál Administrasaun no Finansa Ministériu Transporte no Komunikasaun (MTK), Deonísio de Araújo, informa katak tinan oin ministériu sei hola ró barikasa hodi transporta materiál pezadu sira bá iha munisípiu sira dook.

“Tanba ita-nia kontentór sira labele lori materiál pezadu hodi la’o iha dalan hanesan kurva mate sira, no ida ne’e sei difikulta kontentór sira, ministériu iha hanoin no planu ida katak tenke hola duni ró barikasa ida para aban bainrua bele tulun kontentór sira lori materiál pezada ba munisípiu sira dook iha Timór laran”, dehan Deonísio iha Kaikoli, ohin.

Nia dehan bainhira barikasa ne’e iha ona, entaun kontentór sira la bá hatún sasán iha munisípiu no postu administrativu sira tanba iha ona ró ne’e bele ajuda hodi rezolve ba kestaun ne’e.

“Primeiru-Ministru mak hakarak, nune’e orienta ba Ministériu Transporte no Komunikasaun atu tula sasán todan sira ne’e, duké uza trek no kontentór sira. Tanba ne’e, prevee osan uitoan atu hola ró ida ne’e transporta materiál sira bá munisípiu ou postu administrativu sira iha Timor-Leste hanesan Lospalos, Beasu, no to’o Betanu, kuandu aban bainrua komunidade sira hakarak tula sasán todan”, Deonísio haktuir.

Nia dehan se orsamentu tinan oin MTK nian aprova ona iha Parlamentu entaun ministériu hola kedan ró refere hodi komesa halo ona operasaun no jestaun ba iha ró ne’e rasik sei halo husi parte APORTIL.

Orsamentu ne’ebé prevee iha kapitál menór atu sosa ró ne’e iha tinan oin mak millaun $5.

Jornalista : Natalino Costa

Editora : Maria Auxiliadora

HAKEREK NO HATÁN

Please enter your comment!
Please enter your name here