Sesaun plenária Parlamentu Nasionál. Imajen/Tatoli

DILI, 24 setembru 2019 (TATOLI) – Membru Parlamentu Nasionál (PN) preukupa ho movimentasaun Polísia Nasionál Timor-Leste (PNTL) ba situasaun rai laran, liga ho kazu ne’ebé akontese iha Ai-Mutin, horisehik.

Deputadu Bankada PD, Mariano Sabino ‘Assanami’, observa durante ne’e akontesimentu iha Liquiçá, Ai-Mutin no fatin seluk, haree ba joven mate hanesan laiha valór enkuantu prezensa Estadu tuir Konstituisaun atu proteje ema hodi moris livre husi situasaun hirak ne’e.

“Ita-nia mehi atu tama ba ASEAN maibé situasaun iha rai laran iha ita-nia matan hela. Husu Ministru Defeza no Seguransa katak operasaun Polísia nian to’o iha ne’ebé no operasaun intelijénsia to’o ona iha ne’ebé? Tanbasá mak situasaun kontinua nune’e?”, kestiona Assanami liuhosi plenária iha PN, tersa ne’e. 

Nia fó hanoin ba PNTL tenke halo movimentasaun ne’ebé rigór no firmeza, nune’e ema hotu bele moris ho livre.

“Ne’e hatudu evidénsia forte katak ita la kontrola situasaun hodi sai fraku no frájil”, nia hateten.

Iha fatin hanesan, Deputada Bankada PD, Elvina Sousa, kondena maka’as kazu Ai-mutin.

“Para ona ho aktu ema mate ne’e. Mate ne’e la justu tanba sira sei presiza futuru. Ha’u kondena maka’as asaun ne’e no husu Polísia halo investigasaun ho kle’an”, argumenta Deputada Elvina.

Nune’e mós,  Deputadu Bankada CNRT, Ricardo Baptista, husu joven sira atu hadomi malu no kontinua serbisu harii nasaun.

“Ha’u hanesan joven ida tuur iha ne’e, hakarak husu ba maluk joven ne’ebé sei eskola kontinua eskola no sira ne’ebé serbisu kontinua serbisu. Labele mete iha atu violénsia”, subliña Deputadu Ricardo.

Ba kestaun ne’e, Ministru Reforma Lejizlativa no Asuntu Parlamentár, Fidelis Leite Magalhães, informa ba deputadu sira katak Primeiru-Ministru, Taur Matan Ruak, fó ona orientasaun ba Ministru Defeza, Filomeno da Paixão de Jesus hodi haree kle’an kazu konfrontu iha Ai-Mutin.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here