Polisia Nasional Timor Leste kaptura membru Koliamao 2000 nain rua ne'ebé deskonfia envove iha konfrontu ho grupu joventudi sira iha Aimutin hodi hamate membru Kolimau 2000 ida mate iha fatin iha area Aimutin, Segunda 23 Setembru 2019. Imajen/Eugenio Pereira

DILI, 24 setembru 2019 (TATOLI)-Vítima kazu konfrontu Ai-mutin, Ivonio da Silva, família sira simu ona husi Ospitál Nasionál Guido Valadares (HNGV) no lori ona ba nia moris fatin Maubise hodi ba halo funerál.

Vítima ho idade 22 ne’e husi Munisípiu Ainaro, Postu Administrativu Maubesi, horiseik 11:35 tama iha ospitál, ohin dadeer halo autópsia iha 8:30 no 11:20 entrega ona ba família matebian.

“Mate lori ona ba nia moris fatin, ami tenke pasiénsia atu simu tanba ami lakohi kria distúrbiu iha rai ida ne’e. Ami fiar katak nasaun iha seguransa atu buka autór sira ne’ebé halo krime ida ne’e,” dehan Prezidente Komisaun Organizadora (KO) ba eventu misa 22, Julio Sarmento Meta Malik, ba jornalista sira iha HNGV, ohin.

Nia haktuir: “Horiseik hakilar ita-boot sira sente ka haree, rona lian maran tanba hakilar. Husi Ermera atu fila fali mai Dili, sira para iha Railaku atu fila fali mai Dili, Maliana para hela iha Kasait atu fila fali mai Dili, Same, Suai atu fila fali tun husi Manleuana mai, ha’u dehan lae ne’e nasaun”.

“Ita foin misa horibainrua, misa ida ne’ebé Amu Bispu nia mensajen, se imi fiar duni Na’i Jesus, imi kontribui no imi obedese no atu bele ema basa hasan sorin, se tan sorin atu ita bele manan vitória salvasaun. Ida ne’e, mak ami esforsu durante loron tomak ida horiseik to’o horikalan Dili laran hakmatek to’o ohin,” tenik   Prezidente Komisaun Organizadora Julio Sarmento Meta Malik.

Nia hateten, fiar katak, depois hakoi tiha mate sei fila mai, depois sei hato’o mós konferénsia ruma tan. “Ami husu nafatin polisia, ne’e kompeténsia polísia tomak atu buka buat ne’e to’o ne’ebé atu nune’e polísia bele hetan konfiansa husi povu rai ida ne’e, lae polisia lakon konfiansa”.

“Tanba ita hotu hakarak kontribui, ohin ukun aan tinan 20, maibé ita-nia rai seidauk estavel, ita haki’ak buat grupu ki’ik oan sira ne’ebé hakarak estraga estabilidade iha ita-nia rai mas grupu Sagrado Coração de Jesus, grupu Colimau, komandu libertasaun Maubere, Colimau 2000 hakarak kontribui,” dehan Prezidente Julio Sarmento.

Iha parte seluk, família matebian Ivonio da Silva hateten: “Ami vítima tetap (nafatin) sai vítima, ami lakohi sai suspeitu. Se mate atu tau iha Dili, atu tau iha ha’u-nia uma karik, orasida problema bele sai boot, vítima bele sai fali suspeitu,” dehan Jose da Conceição da Costa, nu’udar matebian nia tiu ho triste.

Tanba ne’e, tuir família vítima katak buat hotu entrega ba Maromak. “Ami nafatin ezije seguransa tenke halo investigasaun kle’an tanba misa ne’e buat hotu entrega iha seguransa nia liman, ami fó koñesimentu ba komandante eskuadra, ba Komandante Munisípiu no mós Komandu Polísia Nasionál Timor-Leste, iha Munisipiu 12 mai to’o Dili,” nia haktuir.

Entertantu,  mate isin Ivonio da Silva família sira lori ba haloot iha nia moris fatin ne’e akompaña no asegura husi Polísia Nasionál Timor-Leste, husi Dili to’o Maubesi.

Notísia relevante:Aban, Autópsia Vítima Kazu Ai-mutin

Jornalista : Nelia Fernandes

Editór       : Rafy Belo

HAKEREK NO HATÁN

Please enter your comment!
Please enter your name here