Deputi Konsellu Nasionál Juventude Timor-Leste, João Tavares do Nascimento. Imajen/Hortençio Sanchez

DILI, 24 setembru 2019 (TATOLI) – Deputi Konsellu Nasionál Juventude Timor-Leste (CNJTL-sigla portugés), João Tavares do Nascimento, hateten konsellu ne’e hakarak kria kondisaun ne’ebé natoon hodi dezenvolve nafatin foin-sa’e sira liuhosi formasaun tanba joventude mak ai-riin ba Estadu.

Haree ba konfrontu ikus mai ne’ebé sempre envolve ba joven sira, CNJTL hanesan mós organizasaun ne’ebé fó mahon ba juventude hotu iha Timor-Leste, ne’ebé kada tinan organizasaun ne’e sempre loke formasaun oin-oin ba juventude iha nível polítika, edukasaun no oinsá kapasita mentalidade juventude nian atu sai ema ne’ebé iha kapasidade di’ak nune’e bele dezenvolve nasaun.

“Formasaun ba joven sira ne’ebé hala’o durante ne’e, iha joven barak iha interese tebes atu aprende maibé iha joven balun mak tenke lori tempu atu bele halo mudansa ba sira-nia hanoin, maibé ita sempre nafatin esforsu no hakbesik-aan ba sira. Nune’e bele halo sira hateke dook ba oin katak Estadu ne’e hein juventude tanba juventude mak ai-riin ba Estadu,” tenik João Tavares ba Agência Tatoli iha edifisiu CNJTL, Palapaço, tersa ne’e.

Nia mós informa, kada tinan konsellu sempre kria formasaun ba juventude.

“Ita sempre iha formasaun hodi kapasita juventude. Oinsá nia bele hateke ba nia-aan katak nia ne’e ema ne’ebé importante ba Estadu,” nia akresenta.

João Tavares rekoñese, kada tinan problema ne’ebé Estadu no joven sira sempre hasoru mak dezempregu maibé nia fiar ba oin Governu sei esforsu nafatin hodi rezolve.

Nune’e, nia husu ba juventude hotu tenke fó liman ba malu hodi haluha violénsia tanba nasaun hein hela joven nia prezensa.

Timor-Leste hanesan nasaun soberanu ne’ebé hamriik iha nasaun hotu nia leet iha kontinente aziátiku ho nia populasaun 1.167.242 (sensu 2015)  no husi númeru ne’e mane hamutuk 588.561 no feto hamutuk 578.681.

Númeru populasaun uituan maibé kada tinan tasa mortalidade sempre aumenta ba beibeik tanba dezastre, konflitu entre joven, ka problema sosiál, hanesan tristeza boot ida ba nasaun.

Basá, Timor-Leste foin hetan ninia independénsia tinan 20 liubá  maibé joven barak mak seidauk iha hanoin no análiza didi’ak hodi bele aproveita oportunidade ne’ebé agora foin hahú moris ho neneik maibé beibeik.

Enkuantu joven grupu balun sempre rai ódiu no vingansa ba malu, maibé iha joven balun mós uza tebes oportunidade hodi aprende no iha kbiit atu aprende maibé labele hetan oportunidade tanba kampu servisu menus, nune’e joven balun hetan oportunidade servisu iha li’ur.

Organizasaun independente barak ezisti iha nasaun soberanu ne’e hodi fó tulun joven sira kria formasaun oin-oin hodi kapasita mentalidade joven sira-nian maibé joven balun lakohi aproveita oportunidade hirak ne’e.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here