Estudante Pré-eskolár Komunitáriu Abo Lir. Foto: Intelektuál “Solidariedade Rohan Laek”-SRL.

BAUCAU, 24 setembru 2019 (TATOLI)—Diretór Edukasaun Munisípiu Baucau, Januario Natalino José Amaral, informa implementasaun merenda eskolár iha Munisípiu Baucau hasoru problema tanba implementasaun tinan kotuk tuir loron efetivu maibé iha tinan ida ne’e implementasaun merenda eskolár tuir fali périodu.

Agora ne’e, nia haktuir, problema ida mak alokasaun orsamentu ba merenda eskolár ne’e ki’ik liu. Ho razaun ne’e mak sira implementa merenda eskolár ba iha périodi rua atu nune’e estudante sira bele sente ninia implementasaun iha segundu périodu.

“Iha primeiru périodu, ita hotu hatene Orsamentu Jerál do Estadu (OJE)  nia aprovasaun tarde entaun ami implementa ne’e iha segundu  périodu ne’ebé ami implementa iha Maiu no Juñu. Terseiru périodu, ami implementa iha Setembru nia laran hahú iha loron 1 Setembru tinan ne’e,” dehan Diretór Edukasaun Munisípiu Baucau, Januario Natalino José Amaral, ba Ajénsia TATOLI liuhusi entrevista  iha nia knaar fatin, Baucau Vila Nova, tersa (24/09/2019).

Nia hatutan, agora daudaun merenda eskolár la’o hela ho ninia menu husi Ministériu Edukasaun prepara maibé iha Baucau implementasaun merenda eskolár la’o tuir menu ne’ebé ita prepara. Maibé, nia infroma, iha área rurál la’o tuir menu normál hanesan buat ne’ebé iha sira uza maibé laiha ona sira uza menu alternativu.

“Maibé eskola ne’ebé ha’u haree di’ak tebes, loron ida sira la han naan sira rai hamutuk osan depois sira sosa bibi oho labarik sira han. Ne’e ha’u haree rasik ho matan. Merenda eskolár ne’e la’o di’ak tanba kontrolu husi eskola no inan-aman sira,” nia hateten.

Maske nune’e, nia dehan, Ministériu Edukasaun iha Munisípiu Baucau hasoru obstakulu barak hanesan agora iha politíka desentralizasaun administrativa entaun programa balun mak mai direta  iha Autoridade Munisípiu no programa balun sei sentraliza iha Ministériu Edukasaun nia liman.

Nia informa, programa ne’ebé hala’o iha munisípiu sira mak merenda eskolár, subsídiu eskolár, edukasaun pre-eskolár ho alfabetizasaun. Programa haat ne’e mak fó kompeténsia ba lider edukasaun munisipál atu hala’o maibé buat seluk ne’e iha Ministériu Edukasaun nia liman hanesan ba Ensinu Sekundáriu Jerál, Eskola Tékniku Vokasionál, Kurríkulu, Formasaun Profesór, no buat balun sei iha Ministériu Edukasaun nia liman.

“Entaun, ami iha ne’e serbisu hanesan patraun rua. Patraun ida Estatál, patraun ida Ministériu Edukasaun, entaun halo ami kobre rekursu umanu limitadu tebes. Maibé, politikamente ami ne’e loloos iha munisípiu ona. Loron ida ami lakon obediénsia ba Ministériu Edukasaun tanba buat ida laiha kesi ami,” diretór edukasaun munisípiu Baucau ne’e esplika.

Agora daudaun, tuir nia, avalisaun dezempeñu mós iha autoridade munisípiu nia liman, mapa pesoál no orsamentu mós ba hotu autoridade munisípiu nia tutela. Agora, polítika Ministériu Edukasaun ninia ne’e oinsá mak grupu interministeriál ne’e serbisu makaas hodi haree akordu atendimentu interministeriál para oinsá bele hadi’a  ba oin atu serbisu la’o ho di’ak.

Jornalista: Felicidade Ximenes

Editór: Rafy Belo

HAKEREK NO HATÁN

Please enter your comment!
Please enter your name here