Padre João de Deus, SDB. Imajen/Espesiál

DILI, 24 setembru 2019 (TATOLI) – Xefe Estadu, Francisco Guterres Lú Olo, ohin, iha Palásiu Prezidente Nicolau Lobato, Bairru Pité, liuhusi Dekretu Prezidente Repúblika númeru 45/2019, 24 setembru, kondekora matebian Pe. João de Deus Pires, SDB, ho Grau Medalla Órden Timor-Leste.

Estadu fó rekoñesimentu no valoriza kontribuisaun Pe. João de Deus Pires durante prosesu luta libertasaun nasionál hahú husi fó asisténsia ba populasaun ne’ebé rende no militár Indonézia kaptura iha tinan 1979 no 1980 hafoin baze apoiu rahun, iha situasaun ne’ebé difísil tebe-tebes ho hamlaha no moras.

Maski ho ameasa oioin hosi militár Indonézia, Pe. João de Deus Pires kontinua halo ligasaun ho Diresaun Superiór Luta iha ai-laran no Dili ne’ebé konsege haruka korrespondénsia ba rai-li’ur.

Padre João de Deus Pires kontribui mós ba fundasaun eskola bar-barak iha Misaun Salezianu iha ponta leste no kontinua fó formasaun iha eskola sira ne’e.

Pe. João de Deus harii Eskola Téknika Agríkola iha Fatumaca iha 1963, harii orfonatu sira hodi tau-matan ba labarik sira ne’ebé inan-aman mate iha funu laran iha Baucau.

Estadu rekoñese padre João de Deus Pires tanba mós Padre ne’e hatudu sentidu umanista no dedikasaun estraordinária ne’ebé hatudu tiha ona bainhira sei moris.

Liuhusi Dekretu Prezidente Repúblika númeru 45/2019, 24 setembru, Prezidente Repúblika sei entrega kondekorasaun liuhusi ninian reprezentasaun Ministra Edukasaun, Juventude no Desportu, Dulce Jesus Soares.

Pe. João de Deus nu’udar misionáriu husi Portugal ne’ebé hala’o Misaun Katóliku nian iha Timor-Leste dezde 1958 to’o nia mate iha 22 setembru 2019, iha Hospital Nacional Guido Valadares tanba moras.

Padre João de Deus, moris iha Mirandela, Bragança, iha 15 abríl 1928. Iha 2012, Pe. João de Deus simu ona kondekorasaun hosi Estadu ho Órden Don Martinho Lopez. Órden Don Martinho Lopez nu’udar rekoñesimentu hosi Estadu atu valoriza partisipasaun Igreja Katólika iha prosesu libertasaun nasionál Timor-Leste.

Jornalista: Cipriano Colo
Editór: Xisto Freitas

HAKEREK NO HATÁN

Please enter your comment!
Please enter your name here