Embaixadór Tailándia ba Timor-Leste, Danai Karnpoz. Imajen TATOLI/Cipriano Colo

DILI, 24 setembru 2019 (TATOLI) – Embaixadór Tailándia ba Timor-Leste, Danai Karnpoz, despede Prezidente Repúblika (PR), Francisco Guterres Lú Olo, iha Palásiu Prezidente Nicolau Lobato, Bairru Pité, Dili, ohin.

Despedida ne’e hala’o tanba Danai termina ona nia misaun hafoin fulan 17 hala’o serbisu diplomátiku iha Timor-Leste.

Durante enkontru ikus ho Xefe Estadu, Embaixadór Karnpoz rekoñese relasaun bilaterál Timor-Leste ho Tailándia iha progresu maka’as ka avansu ona ba relasaun altu nível.

Hafoin enkontru, embaixadór ne’e espresa ninia esperansa katak relasaun bilaterál ne’ebé avansu ne’e sei kontinua buras liután iha futuru.

Nia mós relata katak Prezidente Repúblika hato’o nia rekoñesimentu boot ba nia esforsu hodi hametin kooperasaun Timor-Leste ho Tailándia.

Nia esplika, Timor-Leste ho Tailándia dezenvolve kooperasaun iha área oioin hanesan agrikultura, saúde públika, dezenvolvimentu rurál, turizmu, edukasaun no área importante seluk.

Entretantu, Tailándia, Repúblika Populár Xina no Noruega mak nasaun tolu dahuluk ne’ebé estabelese nia relasaun diplomátika ho Timor-Leste iha 20 maiu 2002.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here