BAUCAU, 24 setembru 2019 (TATOLI)-  Empreza Acelda kria rasik fatin dulas haree kulit hodi hamenus foos importasaun  husi  rai li’ur. Maske nune’e, oras ne’e zeradór avaria ona no labele halo atividade dulas haree ne’e.

“Ohin loron dumina foos importasaun husi rai liur tanba ne’e ha’u hanoin ita nia rain mós iha natar, iha agrikultór ne’ebé prodú haree  barak  no tinan-tinan komunidade hakilar katak ami prodús maibé merkadu la iha. Ho hanoin hirak ne’e, ha’u koko kria makina dulas haree no iha 2014, ami hahú halo lansamemtu armazen  haree  no iha lansamentu ne’e Eis-Prezidente Repúblika Taur Matan Ruak, atuál Primeiru-Ministru Oitavu Governu nian,” dehan Diretór Acelda Higino da Costa Freitas ba Ajénsia TATOLI iha nia servisu fatin Baucau, segunda ne’e.

Emprezáriu timoroan ne’e hateten, ita to’o ohin loron ne’e foos inportasaun mak dumina no foso ne’e iha ema nia rain durasaun liu ona, sira halo teknolojia oioin foos aat ona maibé  sira halo di’ak, bele inporta mai fali nasaun ida ne’e no ita konsume lorloron no bele mos estraga ita-nia saúde.

“Tanba ne’e mak ha’u hanoin katak agrikultór prodús haree barak entaun ha’u ba sosa  haree kulit iha 12 munisipiu inklui RAEOA. Maibé merkadu mak limite lós tanba ita sei kompete ho foos  ne’ebé mai husi rai li’ur,” tenik Diretór Higino da Costa.

“Agora ita-nia komunidade komprende ona oinsá benifísiu foos rai laran mezmu karun maibé karun ne’e bele hanaruk ita-nia vida maibé baratu ne’e sei habadak ita-nia vida,” nia konsidera.

Diretór Acelda, Higino da Costa informa katak Acelda fa’an foos haree maizmenus tonelada 20 kada fulan no prosesu fa’an foos haree ne’e iha Loja Acelda Baucau, parte vila antiga no fa’an iha supermerkadu sira iha Dili hanesan Lita Store, Loja 88. Maibé, to’o agora makina avaria, entaun foos haree balun sei rai hela iha ne’e. “Foos haree ne’ebé ami fa’an kada kilo 1 dolar amerikanu maibé sira faa’n iha Dili 10 kilo 10 dolar, folin hanesan hotu”.

“Ami iha fidikuldade tanba iha 2014 ami hetan lansamemtu husi atuál Primeiru-Ministru ami husu ba eis prezidente republika katak se bele dada hela eletrisidade tanba ami iha ne’e uza zerador deit entaun ami prezisa trafo ruma hodi bele fasilita lalais ami-nia servisu depois kada fulan mak ami selu taxa ba estadu maibe na realidade to’o ohin loron ita seidauk hetan ida ne’e,” informa Diretór Acelda.

“To’o agora ami hetan problema boot, armazen haree nakonu hela no agrikultór mós husu ami atu hola sira-nia haree maibé ami hetan difikuldade tanba zeradór avaria ona no ami labele prodús tanba zeradór ne’e mai husi Brazil, entaun ninia sasán iha Timór la iha atu hadi’a. Ami halo rendimentu lubuk ona hodi hasa’e  rendimentu povu nian no hasa’e ekonomia iha ita-nia rai laran hodi hamenus foos husi rai li’ur mai,” reforsa tan diretór ne’e.

Iha biban hanesan, Emprezáriu timoroan ne’e husu ba governu hodi tau-matan ba konpaña Acelda tanba konpaña la servisu ho ema estrajeiru ruma maibé serbisu mesak hodi responde fali ba komunidade agrikultór sira  no ita rasik mak lao no  rekolla rasik foos haree iha ne’ebé de’it hodi mai halo prosesamentu foos  lokál ne’ebé nakonu iha armazen ne hamutuk  160 tonelada.

Notísia relevante:Acelda Prodús Mina-Nuu Orijinál

Jornalista: Felicidade Ximenes

Editór      : Rafy Belo

HAKEREK NO HATÁN

Please enter your comment!
Please enter your name here