Sekretáriu Estadu Ambiente, Demétrio do Amaral de Carvalho. Imajen/ Tatoli.

DILI, 23 setembru 2019 (TATOLI) – Sektetáriu Estadu Ambiente (SEA), Demétrio do Amaral de Carvalho, informa Timor-Leste (TL) hetan ona impaktu husi alterasaun klimátika oin-oin, hanesan inundasaun, bailoro naruk, rai monu, nivel tasi sa’e, aumenta temperatura no seluk-seluk tan.

“Konsekuénsia hosi impaktu alterasaun klimátika ne’e hamosu ona dezastre oin-oin, hanesan bee-matan sira sai menus no balun sai maran, inundasaun estraga infraestrutura públika no privada no mós hamosu refujiadu klimátika”, Sektetáriu Estadu afirma liuhosi konferénsia imprensa iha Bebora, ohin, relasiona ba Simeira Klimátika iha Asembleia Jerál Nasaun Unida ba dala-74 iha Nova Iorke, Estadu Unidu Amérika ho tema “A Race We Can Win, A Race We Must Win” ka “Halai Ita Bele Manán, Halai Ita Tenke Manán”.

Demétrio do Amaral dehan, bailoro naruk mós bele rezulta produsaun agrikultura sai menus, nune’e hamosu rai hamlaha, má nutrisaun no kriasaun moras oin-oin.

“Atu hametin liután asaun sira iha leten, Governu liuhusi SEA kontinua tau atensaun ba kestaun alterasaun klimátika. Governu liuhusi SEA ativamente partisipa iha forum internasionál kona-ba alterasaun klimatika hodi kontinua hetan ajudu hosi país dezenvolvidu sira kona-ba fundu, teknoloja no kapasitasaun hodi habiban liután asaun adaptasaun no mitigasaun ba kombate alterasaun klimátika, liuliu ajudu balun ne’ebé deside tiha ona iha Akordu Paris no mós Konvensaun Kuadru Nasaun Unida ba alterasaun klimátika”, dehan Demétrio.

Iha parte seluk SEA haktuir, emisaun gas estufa iha Timor-Leste sei ki’ik liu, hanesan porsentu 0.003 kompara ho emisaun globál katak Timor-Leste ninia kontribuisaun ba emisaun globál ki’ik liu, maibé impaktu alterasaun klimátika ne’ebé Timor-Leste enfrenta sai boot liu.

Eis deputadu ne’e salienta, faktu sira ne’e hatudu katak Timor-Leste sai vítima ba impaktu alterasaun klimátika ne’ebé hamosu husi país zigante sira, liuliu nasaun industrializada sira. Maski nune’e, Timor-Leste foti ona asaun reál balun hodi implementa no kombate polítika no programa alterasaun klimátika mak hanesan, Timor-Leste ratifika Konvensaun ONU ba alterasaun Klimátika (UNFCCC) iha 2006 no hahú implementa iha 2007.

Governante ne’e haktuir tan, TL mós ratifika Protokolu Kyoto primeira faze iha 2008 no hahú implementa iha 2009, ratifika Akordu Paris iha 2017. Timor-Leste iha kompromisu mós atu ratifika akordu Paris ba daruak nian. TL liuhosi SEA dezenvolve ona Programa Asaun Adaptasaun Nasionál (NAPA) hodi hasa’e reziliénsia ba kurtu prazu.

NAPA iha programa prioridade sia no implementa ona hahú iha 2011 to’o ohin loron finansia husi Fundu Globál Ambiente ka GEF, Fundu Kilmátika Verde, Fundu Bilaterál sira no fundu hosi orsamentu Estadu. No Timor-Leste submete ona relatóriu Nasionál ba Alterasaun Klimátika Initial National Communication (INC-sigla Inglés) ba dahuluk iha 2014 ba Sekretariadu UNFCCC, semana ne’e, 26 setembru 2019 sei aprezenta relatóriu nasionál daruak ba iha CoMs hodi aprova no submete ba Sekretariadu UNFCCC. Kada tinan 4 TL hato’o relatóriu alterasaun klimátika ba Sekretariadu UNFCCC.

Timor-Leste liuhusi SEA hahú daudauk prosesu formulasaun ba Planu Adaptasaun Nasional (NAP) hodi adapta no hasa’e reziliénsia ba tempu médiu no mós naruk. Lansamentu ba formulasaun NAP sei hahú semana ida ne’e nia laran, iha 27 setembru 2019.

Hafoin lansamentu ba NAP, sei iha konsultasaun kle’an ho ministériu relevante sira, ajénsia no mós parseiru hothotu hodi sai ho planu adaptasaun nasionál ne’ebé integadu no kompriensivu. Objetivu husi NAP mak atu integra asuntu adaptasaun ba impaktu alterasaun klimátika ba iha planu, programa, projetu no mós asaun setorál no mós lokál hodi hasa’e reziliénsia.

Atubele ajuda integrasaun adaptasaun ba iha planu setorál, SEA formula tiha ona esbosu finál polítika kona-ba alterasaun klimátika no sei aprezenta ba iha Konsellu Ministru iha tempu badak. Projetu no atividade sira ba implementasaun prioridade husi NAPA hala’o tiha ona ka implementa daudauk husi ministériu relevante no ajénsia implementadora sira, inkluindu projetu kona-ba adaptasaun no reziliénsia infrastrutura rurál ho eskala ki’ik, salva guarda estrada husi inundasaun, rai monu no sedimentasaun iha Dili-Ainaru korridór no Manatutu-Natarbora korridór.

Reabilitasaun ai-parapa iha área tasi ibun no mós jestaun área kosteira, fornesimentu bee-moos ba komunidade hodi adapta ba bailoro naruk, jestaun basia idrográfika, prosesamentu rai fini hodi evita fuhuk, kapasitasaun adaptasaun iha área, promosaun no selesaun fini ne’ebé adaptivu ba impaktu alterasaun klimátika, jestaun agrikultura sustentavel no mós hasa’e reziliénsia iha setór saúde.

Iha mós projetu no atividade kona-ba sistema alerta antes dezastre mosu, konservasaun florestál, sensibilizasaun públiku, avaliasaun vulnerabilidade ne’ebé implementa hosi ajénsia no ministériu relevante sira iha Timor-Leste.

“Kona-ba mitigasaun, promosaun enerjia renovavel sai hanesan prioridade aas liu ba Timor-Leste. Agora dada’uk, ajénsia no mós ministériu relevante sira promove no fahe solár sel ba iha komunidade área remota ne’ebé dook hosi liña eletrisidade nasionál. Agora dada’uk kuaze porsentu 11 umakain Timor-Leste ka umakain hamutuk 205,361 mak asesu tiha ona ba solar home system ne’ebé barak liu fahe husi Governu Timor-Leste, adisionalmente, utilizasaun fugaun ka cooking stoves mós hala’o tiha ona iha parte balun iha Timor-Leste”.

Promosaun no utilizasaun kompostu hosi animál sira-nia teen mós hala’o tiha ona iha área agrikultura. Iha mos peskiza balun kona-ba utilizasaun biochar husi hare kulit, ai-uut no utilizasaun animál sira-nia teen hodi hasa’e produsaun ai-horis mós hala’o tiha ona hosi universidade sira hamutuk ho Ministériu Agrikultura no Peska, ne’ebé kontribui mós ba mitigasaun gás efeitu estufa.

Agora daudaunn liuhusi SEA mós implementa ona polítika zero plástiku. Implementa Avaliasaun Vulnerabilidade Integradu ka IVA iha nivel sukuhodi identifika área sira ne’ebé vulneravél hosi impaktu alterasaun klimátika. Tuir planu ne’ebé iha sei hala’o IVA 157 ou pursentu 35 hosi totál suku 452 iha Timor-Leste.

Problema sira ne’ebé identifika iha IVA sei responde diremente husi SEA no ministériu relevante sira liuhusi orsamentu Estadu, GEF, GCF, Adaptation Fund no Fundu liuhusi kooperasaun bilaterál.

“Atu hametin liután asaun sira, Governu liuhusi SEA ativamente partisipa iha forum internasionál kona-ba alterasaun klimátika hodi kontinua hetan ajudu hosi país dezenvolvidu sira kona-ba fundu, teknolojia no kapasitasaun hodi habiban liután asaun adaptasaun no mitigasaun ba kombate alterasaun klimátika, liuliu ajudu balun ne’ebé deside tiha ona iha Akordu Paris no mós Konvensaun Kuadru Nasoun Unida”, subliña Demétrio.

Jornalista : Antónia Gusmão
Editora : Maria Auxiliadora

HAKEREK NO HATÁN

Please enter your comment!
Please enter your name here