Estudante timoroan sira ne’ebé mak sei ba kompete iha Malázia. Foto TATOLI: Tomé Amado

DILI 23 setembru 2019 (TATOLI)-Estudante timoroan na’in lima ne’ebé reprezenta estadu Timor-Leste hodi ba kompete kona-ba siénsia no matemátika iha Malázia konsege hetan 18 lugar. Estudante sekundária sira ne’e konsege elimina grupu 114 husi grupu 132 husi nasaun 11 iha mundu.

Reprezentante estudante sira ne’e, Lucrécia Araújo dos Reis husi Ensinu Sekundária Jerál São Pedro, Comoro hateten, sira hatudu ona buat ne’ebé di’ak liu iha kompetisaun internasionál ne’e maibé grupu sira seluk mós mai ho sira nia matéria ne’ebé mak tama hotu iha kategoria ba ekipa juri sira.

Estudante Ensinu Sekundáriu São Pedro, Lucrécia Araújo dos Reis

“Ita fiar aan iha matéria ne’ebé ita aprezenta maibé ita lakon iha sistema peskiza tanba ita laiha fasilidade hanesan laboratóriu no biblioteka atu foti referénsia no peskiza. Ida ne’e mak ita la konsege liu,” informa Estudante Lucrécia ba Ajénsia TATOLI iha Aeroportu Internasionál Nicolau Lobato Comoro, ohin.

Nia haktuir, sira-nia partisipasaun iha kompetisaun nivel mundiál ne’e hetan apresiasaun maka’as mós husi nasaun seluk. “Kompetisaun ida ne’e foin hetan partisipasaun dahuluk husi Timor-Leste”.

Estudante sekundária, Lucrécia Araújo dos Reis hateten katak sente orgullu tanba bele reprezenta ona estadu Timor-Leste hodi partisipa ho nasaun sira seluk ne’ebé mak nia sistema edukasaun avansadu liu ona, kona-ba siénsia no matemátika iha Malázia.

Maske nune’e, nia sujere ba governu katak: “Ba oin presiza hadi’a liután kualidade edukasaun, governu tenke investe maka’as iha área edukasaun tanba husi edukasaun mak sei lori jerasaun foun Timór nian bele hakat ba nivel internasionál”.

Notísia relevante:Ohin, Estudante Na’in Lima Dezloka Ba Malázia Tuir Kompetisaun

 Jornalista :Tomé Amado

Editór       : Rafy Belo

HAKEREK NO HATÁN

Please enter your comment!
Please enter your name here