Sekretáriu Estadu Ambiente, Demétrio do Amaral de Carvalho. Imajen/ Tatoli.

DILI, 23 setembru 2019 (TATOLI) – Sekretáriu Estadu Ambiente (SEA), Demétrio do Amaral de Carvalho, konsidera simeira klimátika liuhosi Asembleia Jerál Nasaun Unida ba dala-74 iha Nova Iorke motiva tebes Timor-Leste.

Tema ba enkontru ida ne’e mak “A Rave We Can Win, A Race We Must Win” ka “Halai Ne’ebé Ita Bele Manán, Halai Ita Tenke Manán.”.

“Ohin loron importante ba Nasaun Unida iha mundu tomak ko’alia kona-ba “Simeira Klimátika ou Climate Summit”. Tema ida ne’e motiva ita atu tau atensaun ba kestaun alterasaun klimátika iha ita-nia moris loron-loron hahú hosi nivel lokál, nasionál, rejionál to’o iha nivel internasionál”, haktuir Sekretáriu Estadu, ohin, liuhosi konferénsia imprensa iha Bebora.

Governante ne’e informa, área temátiku ne’ebé deskute iha simeira ida ne’e mak, tranzisaun ba utilizasaun enerjia renovavel, sustentabilidade no reziliénsia ba infraestrutura no sidade, sustentabilidade agrikultura, jestaun floresta no tasi, reziliénsia no adaptasaun ba impaktu husi alterasaun klimátika, no aliñeamentu fundu privadu no públiku.

“Husi pontu hirak iha leten, Sekretáriu Jerál ONU bolu país sira hotu atubele mai ho asaun ne’ebé konkreta no realístiku ba kombate alterasaun klimátika”, Demétrio relata.

Nia dehan, Timor-Leste nia esperansa hosi simeira ne’e maka país boot sira, tanba iha simeira Paris, nasaun boot sira deklara atu hasa’e fundu globál sira ba kombate efeitu sira hasoru alterasaun klimátika to’o billaun 200, tanba to’o ohin loron kontribuisaun hosi país boot sira iha fundu globál foin maka to’o billaun 10 ne’e atu responde problema mundiál todan tebes.

“Ita presiza kompromisu barak liután, maibé la’os de’it país hosi setór publiku, tanba ita hatene katak fábrika boboot sira ne’e empreza multi bilionáriu sira envolve iha laran. No ita espera simeira ne’e mós bele hamosu kondisaun iha nivel nasionál, nune’e empreza multi bilionária sira iha nasaun ketak-ketak bele mós fó kontribuisaun hodi ita bele hatán ba problema alterasaun klimátika”, Demétrio katak.

Hodi hatutan, benefísiu ne’ebé Timor-Leste sei hetan iha konferénsia ne’e maka kontinua hetan ajuda hosi país dezenvolvidu sira.

“To’o ohin loron benefísiu sira ne’ebé Timor-Leste hola parte ba hahú kedas hosi 2007 to’o ohin loron ita ezekuta ona fundu hosi alterasaun klimátika ninian no fundu sira seluk ne’ebé iha relasaun ho alterasaun klimátika to’o tiha ona millaun $100, no posibilidade sei hetan tan millaun $64-resin. Ita mós hetan benefísiu seluk hanesan apoia téknika, liuliu reforsa dezenvolvimentu kapasidade institusionál sira mós”, Demétrio dehan.

Iha konferénsia ne’e, Timor-Leste reprezenta hosi Ministru Negósiu Estranjeiru no Kooperasaun (MNEK), Dionísio da Costa Babo Soares.

Jornalista : Antónia Gusmão
Editora : Maria Auxiliadora

HAKEREK NO HATÁN

Please enter your comment!
Please enter your name here