Diplomata Seniór, José Manuel Ramos Horta. Imajen Tatoli/Cipriano Colo

DILI, 23 setembru 2019 (TATOLI) – Diplomata Seniór, José Manuel Ramos Horta akonsella Governu no Estadu atu hili timoroan sai embaixadór iha nasaun seluk karik tenke hili ema ne’ebé hatene ko’alia lian ofisiál Timor-Leste nian no tenke hatene lian barak inklui tenke iha pezu polítiku.

Horta fó konsellu ne’e tanba diplomasia hanesan asuntu ida ne’ebé importante no sériu teb-tebes.

Eis Prezidente Repúblika ko’alia asuntu ne’e hafoin soru-mutuk ho Prezidente Repúblika, Francisco Guterres Lú Olo, iha Palásiu Prezidente Nicolau Lobato, Bairru Pité, Dili, ohin.

Horta esplika, kna’ar embaixadór nian, primeiru, tenke hatene, koñese no domina asuntu hotu kona-ba Timor. Embaixadór ida domina asuntu hotu iha nasaun ne’e, bainhira hamriik iha ema nia oin ka halo diskursu ruma, lalika lee iha ibun de’it, maibé ko’alia kona-ba dezenvolvimentu pozitivu iha ninia rain rasik. Ida ne’e mak embaixadór ida ne’ebé kualidade.

Hanesan ezemplu, nia esplika, bainhira haruka embaixadór ida ba Japaun tenke haree ema ne’ebé hatene ko’alia lian Japoneze ne’e di’ak liután.

Horta haktuir katak atuál Embaixadór Timor-Leste ba Xina, Bendito Freitas, ko’alia lian Mandarin no Governu Xina kontente loos ho ida ne’e.

Nia fó hanoin mós katak uluk eis Embaixadór Timor-Leste ba Kuba (la temi naran), ko’alia di’ak loos lian Español. Aleinde ne’e, eis Embaixadór Timor-Leste ba Portugal mós ko’alia di’ak loos lian Portugés.

“Ida ne’e de’it mós la sufisiente maibé tenke diplomata ida ne’ebé nasaun ne’ebé atu haruka ba ne’e mós koñese nia katak ema ne’e iha mós pezu polítiku ida iha nia rain”, nia esklarese.

Tanba ne’e, Horta propoin atu hili karik, hili mak eis ministru ida, diplomata seniór ida ka ema ne’ebé antes ne’e asumi kargu importante ida no bele mós eis Prezidente Repúblika.

Nia fó ezemplu katak, iha rai balun, hili sira-nia eis Prezidente, eis Primeiru-Ministru sai embaixadór iha nasaun seluk.

Horta sita nasaun sira ne’ebé haruka sira-nia eis Prezidente nu’udar embaixadór mak hanesan Brazíl haruka ninia eis Prezidente, Itamar Franco, nu’udar embaixadór iha Washington no mós iha Roma. Austrália haruka ninia eis Primeiru-Ministru ida nu’udar embaixadór iha Paris.

Enkuantu, Estadu Undu Amérika liuhusi ninia Prezidente John F. Kenedy, haruka ninia oan feto sai nu’udar embaixadór iha Japaun.

Horta sujere nafatin ba Governu atu kaer metin ida ne’e nu’udar referénsia, la’ós tuur-tuur naran haruka ida ba, maski la hatene ko’alia lian ofisiál, nein iha pezu polítiku.

Nia hatutan, iha rai barak mós bainhira sira la koñese embaixadór ne’ebé Governu haruka ba, sira sei la simu, nein fó resposta.

Premiadu Nobel Pás ne’e esplika katak iha linguazen diplomasia, bolu agrema.  Signifika, Governu propoin hodi haruka naran ba, no sira haree, depois sira fó sira-nia agrema.

“Agrema ne’e lian França, katak sira-nia konkordánsia. Bainhira ema la fó resposta ne’e ita hatene de’it ona katak sira la konkorda ho ema ne’ebe ita propoin ba”, Horta esplika.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here