Sesaun plenária Parlamentu Nasionál. Imajen dok. Tatoli

DILI, 23 setembru 2019 (TATOLI) – Membru Komisaun D ne’ebé trata Asuntu Ekonomia no Dezenvolvimentu, foin lais ne’e, halo fiskalizasaun ba projetu iha Munisípiu Aileu, liliu iha área agrikultura.

Nune’e, liuhosi plenária segunda ne’e, Deputada Relatora hosi Bankada KHUNTO, Olinda Guterres, akompaña hosi Prezidente Komisaun D, Virgínia Ana Belo, hato’o relatóriu fiskalizasaun.

Iha relatóriu ne’e, Komisaun D husu Governu atu tau atensaun ba natar no área potensiál hanesan ortikultura iha Munisípiu Aileu tanba iha redusaun.

“Diretór Agrikultura no Peka Munisípiu Aileu informa mai katak, tuir dadus Indonézia nian, Munisípiu Aileu totál área natar ektare 717 maibé hafoin halo levantamentu dadus foun iha tinan 2013, totál área natar hetan de’it ektare 398. Signifika, redusaun ida ne’ebé boot tebes ba área potensiál tanba natar sira ne’e kolokadu iha mota-ninin no laiha barreira atu satan mota entaun kada tinan redusaun ba área natar”, hateten Relatora Olinda Guterres liuhosi plenária Parlamentu Nasionál, segunda ne’e.

Liuhosi fiskalizasaun ne’e, membru Komisaun D sira deteta, maski irrigasaun iha Suku Daisoli, Munisípiu Aileu funsiona ho di’ak, maibé produsaun ba hare ki’ik.

Tuir Deputada Relatora, Munisípiu Aileu hanesan área potensiál ba ortikultura ne’ebé boot liu kompara ho munisípiu sira seluk tanba ne’e produsaun ortikultura boot tebes no iha orientasaun agrikultór ba merkadu.

“Tuir dadus tinan 5 ba kotuk, totál produsaun ortikultura mak tama iha Supermerkadu Kmanek no Supermerkadu Dili Mart hamutuk kilógrama 1107. Iha redusaun ba kilógrama 504 tanba impaktu hosi Supermerkadu Kmanek atu taka”, haktuir Olinda Guterres.

Diretór Munisipál Agrikultura no Peska Aileu, Gallieni da Costa, relata ba Komisaun D katak durante nia asumi kargu iha 2011, enfrenta ona problema boot iha produtividade tanba Aileu la besik tasi ho rekursu poténsia ne’ebé ki’ik kompara ho munisípiu sira seluk.

Totál estensionista ne’ebé destaka iha Aileu hamutuk ema na’in 19 no totál tratór ne’ebé destaka iha Aileu komposta hosi tratór boot 6 no handtratór 61.

Dadus ema ne’ebé tuir sensu agríkola hamutuk na’in 992 no faze selesaun dokumentu liu ema na’in 678, no hosi diresaun presiza ema 145, tanba sensu ida ne’e la hanesan sensu populasaun.

Orsamentu 2019 ne’ebé aloka ba Diresaun Munisipál Agrikultura no Peska Aileu ba saláriu no vensimentu $150.000, bens no serbisu $46.000 hodi operasionaliza estensionista, guarda florestál, pekuária no veterinária.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here