Arcebispo ba Arquidiocese Metropolitana Dili, Don Virgílio do Carmo da Silva, SDB. Imajen/Tatoli.

DILI, 23 setembru 2019 (TATOLI) – Arcebispo ba Arquidiocese Metropolitana Dili, Virgílio do Carmo da Silva, SDB, hatete igreja Katólika kontinua nia identidade hodi apoia dezenvolvimentu nasionál liuhosi setór edukasaun no asuntu sosiál.

“Asuntu rua, mellora edukasaun no sosiál ne’e mak igreja sei kontinua kontribui no aumenta igreja nia papél iha evanjelizasaun ne’ebé kontinua halo iha Timor-Leste”, Bispu Virgílio do Carmo, afirma iha edifísiu Ministériu Finansa, Aitarak-Laran, ohin.

Bispu Dioseze Dili ne’e dehan igreja Katólika mantén espíritu hodi kontribui ba setór edukasaun no asuntu sosiál tanba edukasaun dezde inísiu misionáriu sira mak mai hahú loke edukasaun husi invazór nia tempu to’o mai ukun-aan, nune’e labele hasai ona husi identidade uma-kreda nian.

Bispu Virgílio dehan dioseze tolu hanesan Dili, Baukau no Bobonaru hamutuk harii ona eskola 102-resin ho nia alunu kuaze rihun 5-resin ne’ebé hahú husi eskola pré-eskolár to’o ensinu superiór.

“Igreja nia responsabilidade atu eduka joven no labarik rihun 5-resin kada tinan ne’e, liuhusi edukasaun formál nó naun-formál”, katak.

Bispu Dili ne’e dehan igreja Katólika haree katak liuhusi edukasaun mak bele lori no hadi’ak dezenvolvimentu nasionál liuliu prodús rekursu umanu ne’ebé ho kapasidade.

Igreja mós iha mehi atu dezenvolve setór edukasaun, maibé iha limitasaun rekursu umanu no finanseira, más iha tinan rua tuir malu halo ona asinatura ho Governu hodi apoia finanseiru ne’e bele fasilita hametin dezenvolvimentu edukasaun iha Timor-Leste.

Kona-ba asuntu sosiál, Bispu dehan sei kontinua apoia, liuliu loke klínika, fatin orfanatu no mantén evanjelizasaun hanesan papél importante uma-kreda Katólika.

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here