Xefe Departamentu Rejistu Veíkulu DNTT, Nelson Martins. Foto/Natalino Costa.

DILI, 23 setembru 2019 ( TATOLI) – Xefe Departamentu Rejistu Veíkulu Diresaun Nasionál Transporte no Terrestre (DNTT) Ministériu Transporte no Komunikasaun, Nelson Martins, hateten daudaun ne’e transporte antigu barak maka halo operasaun, tanba ne’e tempu ona atu halo lei hodi regulariza viatura tuan sira.

“Ami iha ona planu atu regula transporte tuan sira hodi bandu sira labele halo operasaun. Daudaun ami haree hela ho ami-nia asesór jurídiku atu haree ida ne’e. Ami bele iha inisiativa no planu, maibé hirak ne’e tenke fortifika mós husi Ministru Transporte no Komunikasaun”, dehan nia ba Tatoli iha Balidi, ohin.

Nia dehan kestaun ida ne’e sai ona preokupasaun ba DNTT no ministériu. “Tanba foin daudaun ministru mós preokupa hodi husu ba DNTT atu haree ba kestaun oinsá atu regula transporte sira ne’ebé tuan ona”, relata Xefe Departamentu Rejistu Veíkulu ne’e.

Tanba ne’e DNTT rasik prepara ona planu ne’e, maibé ministru mak tenke defende maka’as lei ne’e bainhira halo diskusaun iha Konsellu Ministru.

Se lei ne’e hetan aprovasaun, entaun DNTT sei servisu hamutuk ho PNTL hodi haree ba transporte antigu sira ne’e hodi labele halo atividade tan.

Bainhira halo nafatin maka nia suar bele provoka saúde ne’ebé ladi’ak ba ema seluk no poluisaun ka fó impaktu ba ambiente ne’ebé maka besik. Tanba ne’e maka presiza iha lei ne’e atubele proibe ona viatura antigu labele halo operasaun.

Notísia relevante : Seidauk Iha Regulamentu Atu Regula Viatura Tuan Ne’ebé Sei Halo Operasaun

Jornalista : Natalino Costa

Editora : Maria Auxiliadora

HAKEREK NO HATÁN

Please enter your comment!
Please enter your name here