DILI, 22 setembru 2019 (TATOLI)-Sekretáriu Jerál Partidu FRETILIN (Frente Revolucionário de Timor Independente), Marí Alkatiri hato’o sentidu kondolénsia ba matebian padre salezianu, João de Deus Pires, SDB.
“Padre João de Deus Pires mós fó kontribuisaun boot ba rezisténsia ida ne’e durante 24 anos tanba ne’e nia hanesan padre no mós sai hanesan eroi ida,” hateten Sekretáriu Jerál, Marí Alkatiri ba jornalista sira bainhira ba haree mate isin, amu João de Deus, iha sala Mortuariu, Ospitál Nasionál Guido Valadares (HNGV), ohin.
Fundadór partidu FRETILIN ne’e mós hato’o mensajen ba sarani katólika sira tomak liuliu Salezianu Dom Bosco katak: “Halo tuir ezemplu padre João de Deus ne’ebé entrega aan ba povu Timor-Leste no entrega aan tuir dalan relijiaun nian. Timor-Leste lakon ema ida ne’ebé ninia istória naruk no boot hanesan ne’e”.
Notísia relevante:Sentidu Kondolénsia Pe. João de Deus
Jornalista :Felicidade Ximenes
Editór : Rafy Belo