Kuadru FRETILIN sira partisipa iha Konferénsia Jerál Kuadru FRETILIN ba datoluk durante loron rua (21-22 setembru 2019), iha Dili. Imajen Mídia FRETILIN

DILI, 22 setembru 2019 (TATOLI)—Enserramentu Konferénsia Jerál Kuadru FRETILIN ba datoluk ne’ebé termina ohin iha Canossa Has-Laran, Manleuna, Dili, konklui asuntu importante lima.

Asuntu hirak ne’e mak hanesan; hametin FRETILIN nia unidade no satan tiha tentativa externa oioin ne’ebé atu harahun FRETILIN,  FRETILIN hahú programa formasaun polítika patriótika, FRETILIN hala’o levantamentu dadus no serbisu hamutuk ho eleitór foun sira ho idade tinan 17 ba leten, FRETILIN kontinua implementa deklarasaun Viqueque ne’ebé ko’alia kona-ba atividade sósiu-ekonómiku no hahú prepara ba FRETILIN nia vitória iha eleisaun sira tuir mai iha nível nasionál no munisípiu sira.

Haree mós: FRETILIN Análiza Vida Estadu Liuhusi Konferénsia

Iha loron daruak ne’e, Konferénsia Jerál Kuadru FRETILIN mós aprova rezolusaun ida hodi agradese Vatikanu no liliu Amu Papa Francisco tanba fó konfiansa ba Igreja Katólika Timor-Leste hodi harii Archediocese no mós fó parabéns ba Primeiru Arcebispo Timoroan, Don Virgílio do Carmo Silva, SDB, ba nomeasaun no depózita FRETILIN nia konfiansa no votu susesu ba Don Virgílio.

Antes ne’e, liuhusi abertura konferénsia, Sekretáriu Jerál FRETILIN, Marí Alkatiri bolu atensaun ba determinasaun atu kontinua defende Estadu Direitu Demokrátiku no atu impede ninia diluisaun ne’ebé provoka hosi afirmasaun “podér informál” ida ne’ebé hakarak atu kondúz destinu nasaun nian haksumik tiha órgaun soberania sira-nia funsionamentu.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here