Prezidente Parlamentu Nasionál, Arão Noé de Jesus da Costa Amaral. Imajen Tatoli/António Gonçalves

DILI, 22 setembru 2019 (TATOLI) – Prezidente Parlamentu Nasionál, Arão Noé de Jesus da Costa Amaral, hateten dame (pás) importante ba iha prosesu dezenvolvimentu rai-laran.

“Pás agora nesesidade no sai prioridade ba nasaun ida-idak iha mundu tomak, tanba laiha pás, laiha dezenvolvimentu”, diskursu Arão Noé, iha programa debate “Lian hosi lian laek” ne’ebé realiza iha Salaun Igreja Hosana Bebora, Dili, sábadu (21/9).

Tuir nia, Parlamentu Nasionál Timor-Leste aprezenta sentidu agradesimentu ba Don Norberto do Amaral, Bispu Dioseze Maliana, nu’udar Prezidente Konferénsia Episkopál Timor-Leste no Komisaun Nasionál Justisa no Pás, ne’ebé konvida nia partisipa iha eventu importante ne’e hodi komemora Loron Mundiál ba Pás.

Arão informa, pás mundiál hanesan ideia liberdade ida ba nasaun hotu, hakat ba fronteira liuhosi direitu umanu, teknolojia, edukasaun, enjeñaria, medisina no diplomata.

Tanba, tuir nia, mundu nia rohan muda dadaun ona sékulu foun, hetan dezafiu ne’ebé diferente–bele dehan laiha konflitu nakloke no direta entre súper kompeténsia mundiál ne’ebé mosu ameasa asimétrika nu’udar terrorizmu trans nasionál ne’ebé permiti ema hotu ho númeru ki’ik nakonu ho ódiu halo terrór nasaun sira no harahun sivilizasaun.

“Konflitu étiku ka sektáriu ne’e implika ema mate, lakon sasán, harahun hotu ekonomia, kria refujiadu no dezlokadu internu. Se situasaun hanesan ne’e husik livre, Estadu lakon tiha kontrolu no mosu sé-sé mak forsa liu, nia mak domina, no hamosu kontradisaun entre grupu hanesan agora dadaun akontese iha nasaun balun iha Ázia no Áfrika”, nia haktuir.

Arão afirma, pás tenke bazeia respeita no dignidade umana inklui direitu fundamentál ema ida-idak nian. Só ida ne’e mak foin bele hetan pás ida ho loloos. Tanba, mundu agora iha sosiedade no nasaun ida nia laran, laiha respeitu malu no laiha tratamentu hanesan ba ema hotu mak pás labele dura.

Nia hatutan, iha nasaun Timor-Leste prova dadaun katak aspirasaun lejítima hosi povu bazeia ba valór universál sei forte liu katak aspirasaun ho esperansa moris livre efikás liu duké buat seluk.

“Pás no estabilidade ne’ebé ita iha la’ós Estadu nia serbisu, maibé hetan kolaborasaun no kontribuisaun hosi sosiedade sira hotu”, katak Arão Noé.

Tanba ne’e, nia tenik, iha IV Governu Konstitusionál hasai moto ida katak “Adeus konflitu, benvindu dezenvolvimentu”, iha ne’ebé povu profunda tebes moto ida ne’e ho firmeza.

Nune’e, krize 2017 mai to’o agora, povu hakmatek nafatin no la monu ba provokasaun sira. Ne’e duni, aproveita tempu ne’e nia hakarak hato’o agradesimentu kle’an ba povu no juventude Timor-Leste.

Arão esplika katak mundu haree hela esperiénsia ne’ebé kria pás no estabilidade. Hanesan ezemplu, relasaun Timor-Leste ho Indonézia agora iha faze ne’ebé diferente tebes, tanba iha Comissão Acolhimento Verdade e Reconsiliação (CAVR) no harii Komisaun Verdade no Amizade (CVA-sigla portugés) hodi hamosu rekomendasaun balun ba nasaun rua atu implementa no faze seluk tama dadaun ona maski sei hetan dezafiu barak.

“Ha’u fiar katak ita iha dalan ne’ebé loos. Ita iha vizaun ne’ebé di’ak no ita sei hetan objetivu ida di’ak ba povu no Estadu iha futuru”, Arão haklaken.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here