DILI, 21 setembru 2019 (TATOLI)- Xefe Estadu Maiór Jenerál FALINTIL-Forsa Defeza Timor-Leste (F-FDTL), Majór Jenerál Lere Anan Timur, ohin, ho delegasaun forsa Timor-Leste arranka ona ba Afrika hodi partisipa enkontru Xefe Estadu Maiór Jenerál Komunidade Nasaun sira Lian Portugeza (CPLP) iha Angola.
Tuir ajenda enkontru ne’e sei hala’o iha loron 25 too 26 setembru 2019 entre Xefe Estadu Maiór Jenerál CPLP hodi ensera ezersísiu militár FILINO 2019 entre forsa CPLP hodi halo reuniaun avaliasaun ba kooperasaun serbisu no diskute modelu kooperasaun serbisu ne’ebé sei kontinua hala’o.
“Ha’u arranka ba Afrika atu partisipa ezersísiu FILINO iha terrenu ne’ebé envolve Xefe Estadu Maiór Jenerál iha Angola hodi ami diskute fila fali tinan ne’e ezersísiu FILINO 2019 sei ensera depois, tinan oin 2020 atu halo fali iha ne’ebé, no see maka sei responsabiliza para hametin liután lasu kooperasaun iha setór defeza,” informa Lere ba jornalista iha Kuartél Jenerál F-FDTL, Fatuhada, Dili.
F-F-DTL hahú envolve iha ezersísiu FILINO iha tinan kotuk, bainhira Timor-Leste envolve iha nu’udar nasaun membru CPLP.
Ezersísiu FILINO ne’e rasik envolve militár husi Timor-Leste, Portugal, Mosambike, Brazil no Angola hodi fahe esperiénsia iha área oin-oin.
Jornalista : Eugénio Pereira
Editór : Francisco Simões
