Kontra-atake entre ekipa Académica FC no Atlético Ultramar iha Estádiu Malibaca Maliana, ohin. Imajen Mídia LFA

DILI, 21 setembru 2019 (TATOLI) – Kampiaun Primeira Divizaun Liga Futeból Amadora (LFA) époka 2019 tenke hein to’o jornada 14, basá laiha klube ida mak pontu aas liu.

Maski Lalenok United FC provizoriamente lidera hela tabela klasifikasaun maibé pontu la dook malu ho Boavista FC Timor.

Lalenok falla uituan tanba iha jornada 13, sábadu ne’e, iha Estádiu Munisipál Dili, Armada Lalenok obrigadu tenke fahe de’it pontu ho ekipa AS Ponta-Leste tanba impata 0-0.

Hosi impata ne’e, lori Lalenok muda de’it pontu ida hosi 26 ba 27. Enkuantu, Boavista FC Timor mós pontu rabat hela ba ekipa refere no sei haree jogu domingu aban ne’e. Karik aban Boavista gaña vitória hosi AD SLB, mak ekipa kapitál Dili ne’e sei muda nia pontu ba 25 hodi hakbesik-aan ba Lalenok. Maibé, karik Boavista la konsege manán SLB, mak dalan luan tebes ba Lalenok kampiaun.

Nune’e, atu sai kampiaun, iha jornada ikus Lalenok tenke manán Académica FC. Bainhira Lalenok lakon no Boavista mak manán Karketu Dili FC, títulu kampiaun tenki monu ba Boavista.

Enkuantu, iha mós jogu LFA iha loron hanesan, ohin,  hala’o iha Estádiu Malibaca Maliana entre ekipa Académica FC Vs Atlético Ultramar, rezulta golu 5-1. Hosi rezultadu ne’e, hatudu momoos ona katak ekipa ne’ebé sei dezpromovidu iha époka 2019 mak ekipa rua ne’e duni, Académica no Ultramar.

Golu Académica nian atribui hosi Francisco Sávio iha minutu 5, Hasan Ramos 26, 45+2, Filomeno Sávio 60, Juvenal Boavida 87 no golu úniku Ultramar hatama hosi Muhamad Hadianto iha minutu 23.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here