Ministru Obra Públika, Salvador Soares dos Reis Pires, Imajen/Florencio.

DILI, 21 setembru 2019 (TATOLI) – Ministru Obra Públika (MOP), Salvador Eugénio Soares dos Reis Pires, hatete husi projetu 143 ne’e, Governu kontinua selu 98 ne’ebé iha kontratu no falta 45 mak seidauk tanba laiha kontratu.

“Projetu 143 kontratu iha ne’e ita-nia Governu kontinua selu nafatin tanba nia orsamentu tau ona iha fundu infraestrutura. Agora, hein de’it mak rezolve projetu 45 ne’ebé seidauk iha kontratu ne’e, ne’ebé ita selu hotu mak ita hatene osan hira mak selu ba projetu sira ne’e”, Ministru Salvador hatete iha edifísiu Ministériu Finansa, Aitarak-Laran, ohin.

Ba projetu 45 ne’e, MOP dehan Gabinete Primeiru-Ministru nomea ona ekipa atu halo hela avaliasaun, molok halo pagamentu.

“Normalmente ami mak nu’udar na’in ba projetu, maibé projetu ho kustu millaun $1 ba leten ne’e Primeiru-Ministru mak tenke halo kontratu ho kontraktor”, katak.

Entretantu, husi projetu 143 ne’e, 45 mak laiha kontratu, maibé iha dezembru tinan kotuk  husi projetu 45 ne’e aprova ona 15, tanba projetu hirak ne’e nia karater urjénsia ne’ebé aprezenta husi Ajénsia Dezenvovlimentu Nasionál (ADN), Komisaun Nasionál Aprovizionamentu (CNA, sigla portugés) no komisaun Administrasaun Fundu Infraestrutura (KAFI).

Antes ne’e, Parlamentu Nasionál liuhusi pedidu Bankada FRETILIN submete rekerimente atu estabelese Komisaun Inkéritu Parlamentár (KIP) ba projetu 143 ho montante osan millaun $345 ne’ebé KAFI aprova iha loron 19 jullu 2017.

Hafoin KIP konklui relatóriu, maibé la konsege aprova iha Parlamentu Nasionál, tan ne’e Oitavu Governu Konstitusionál foti desizaun hodi halo verifikasaun rasik ba projetu 143 refere.

Notísia relevante : MOP Seidauk Hetan Informasaun Hosi Ekipa Avaliadór GPM ba Projetu 143

Jornalista : Florencio Miranda Ximenes
Editora : Maria Auxiliadora

HAKEREK NO HATÁN

Please enter your comment!
Please enter your name here