Konferénsia jerál FRETILIN ba datoluk ne'ebé hala'o iha Canossa Has-Laran, ohin. Imajen Tatoli/Evaristo Soares Martins

DILI, 21 setembru 2019 (TATOLI) —  Partidu Frente Revolusionária Timor-Leste Independente (FRETILIN), hala’o konferénsia ba datoluk iha Canossa Has-Laran, Manleuana, Dili, durante loron rua (21-22 setembru).

Konferénsia ne’ebé ho tema: “Pátria no Soberania-Hosi Konseitu ba Kultura no Vida Institusionál” ne’e halibur konfresista sira hamutuk ema na’in 600 resin, kompostu hosi estrutura nasionál, munisípiu 12 inklui Rejiaun Administrativa Espesiál Oé-Cusse Ambeno (RAEOA) no mós kuadru tékniku sira.

Sekretáriu Jerál Partidu FRETILIN, Marí Alkatiri, hateten Konferénsia Jerál FRETILIN, nu’udar implementadór desizaun Komite Sentrál nian iha loron 8 juñu tinan ida ne’e, ne’ebé desidi atu implementa deklarasaun Retiru Viqueque iha setembru 2018.

Sekretáriu Jerál partidu istóriku ne’e esplika katak konferénsia refere ho objetivu atu halo análize ba Estadu nia vida.

‘’FRETILIN hahú konferénsia jerál kuadru partidu refere nian ba datoluk atu halo análize ba lala’ok vida Estadu Timor-Leste. Konferénsia ida ne’e atu halo diagnóstika no hetan reseita ba problema ne’ebé Repúblika Demokrátika Timor-Leste hasoru dadaun. FRETILIN tenke sai hosi konferénsia ida ne’e ho unidade no metin liután bainhira eleisaun akontese’’, Alkatiri informa ba jornalista sira hafoin abertura konferénsia iha Salaun de City Canossa Has-Laran, ohin.

Nia afirma, konferénsia ida ne’e FRETILIN sei buka dalan ka solusiona ba ema sira ne’ebé atu destroi ka sobu Estadu Direitu Demokrátiku.

‘’Hahú hosi 5 outubru to’o 23 novembru, ha’u sei vizita Timor-Leste tomak. Ha’u agora lidera FRETILIN ho tempu tomak. Ha’u-nia direitu atu tún ba baze atu esplika ba povu kona-ba situasaun atuál. Governu la halo progresu ne’e mak ha’u tún”, hateten Marí Alkatiri.

Iha biban ne’e, Adjuntu Sekretáriu Jerál FRETILIN, José Reis, hateten konferénsia refere atu halo balansu kona-ba deklarasaun ne’ebé mak kuadru FRETILIN halo liuhosi retiru VIQUEQUE nian.

‘’Ohin  konferénsia ida ne’e atu mai halo balansu ida katak sá serbisu mak órgaun partidu nian hala’o ona, saida mak seidauk hala’o no saida mak atu hala’o hosi ne’e ba oin’’, katak nia.

Nia haktuir, rezultadu retiru Viqueque nian halo mós análize ba situasaun rai-laran, previzaun ida ne’ebé mai hatudu momoos katak iha podér informál ida atu infrakese podér formál.

‘’Objetivu konferénsia ida ne’e atu reforsa liután partidu  atu hatene no la’o ba oin di’ak liután’’, José Reis hatutan.

Iha konferénsia jerál ne’e partidu sei rona rekomendasaun hosi koordenadór partidu FRETILIN munisípiu nian.

Nia tenik, partidu FRETILIN la’ós hein de’it eleisaun mak halo serbisu, maibé kada loron sempre halo hela serbisu.

‘’Konferénsia jerál kuadru la’ós órgaun deliberativu, la’ós hanesan kongresu, la’ós hanesan konferénsia nasionál babain. Ne’e atu halo de’it balansu ba kuadru sira atu bele fó hanoin, tetu saida mak atu la’o ba oin di’ak liután. Pontu importante liu mak atu hametin liután partidu atu la’o ba oin infrenta situasaun saida de’it mak mai’’, katak Adjuntu Sekretáriu Jerál.

Entretantu, Prezidente Komisaun Organizadora atuál Sekretáriu Jerál Adjuntu FRETILIN, Flávio da Silva, esplika konferénsia jerál ne’e partisipa hosi lideransa FRETILIN, membru CCF, Komisaun Nasionál Jurizdisaun, reprezentante hosi OPMT, reprezentante hosi juventude FRETILIN, reprezentante hosi kombatente veteranu, reprezentante hosi organizasaun filiada FRETILIN nian, órgaun profisionál FRETILIN nian, reprezentante hosi estudante FRETILIN, ativista FRETILIN no Brigada Nicolau Lobato.

Purtantu, nível munisipál partisipa hosi membru komisaun polítika munisipál hotu-hotu, prezidente komisaun munisipál jurizdisaun, prezidente munisipál fiskalizasaun, koordenadora munisipál OPMT, sekretáriu ezekutivu juventude FRETILIN munisipál no koordenadór postu administrativu sira hotu.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here