Prezidente Repúblika, Francisco Guterres Lú Olo, bainhira hato’o ninia diskursu iha selebrasaun aniversáriu INTERFET ba dala 20 (20 setembru 1999-20 setembru 2019). Imajen Mídia PR

DILI, 20 setembru 2019 (TATOLI) – Durante intervensaun Prezidente Repúblika, Francisco Guterres Lú Olo, iha Komemorasaun Tinan 20 Misaun The International Force East Timor (INTERFET), fó omenájen ba mídia sira ne’ebé ho aten-barani fó-sai ba mundu tomak kona-ba susar no terus ne’ebé timoroan sira hasoru durante setembru 1999.

Nia rekoñese katak mídia sira mak buka fó-hatene mós povu nia mehi ba independénsia. Tanba ne’e, bainhira mídia sira la  halo ida ne’e  karik, mundu kala la hetan koñesimentu natón kona-ba luta ba autodeterminasaun ka ukun rasik-aan.

Aleinde ne’e, Xefe Estadu mós fó omenájen liliu ba militár sira-ne’ebé kumpri sira-nia misaun no fó onra ba ida-idak nia bandeira bainhira partisipa iha Operasaun Estabilizasaun. Misaun ida ne’e hotu ho susesu no  dominasaun Indonézia mós hotu, no dalan loke ba timoroan restaura Timor-Leste nu’udar nasaun.

“Nasaun hamutuk rua-nulu resin ida mak fó sira-nia kontribuisaun tantu boot ka ki’ik ba INTERFET iha periúdu oioin, maibé kontribuisaun boot liu mai hosi Austrália no Nova Zelándia. Tanba ne’e, ita agradese  Governu Austrália ne’ebé kompromete-aan atu lidera esforsu internasionál ba manutensaun pás (dame) hodi restaura fali órden iha  ita-nia rai,” Xefe Estadu dehan liuhusi ninia diskursu iha Komemorasaun Tinan 20 Misaun INTERFET iha Timor, iha Paláçio do Governo, ohin.

INTERFET ninia susesu militár, tuir Lú Olo, sai modelu di’ak ida ba operasaun halo manutensaun  pás sira seluk. Sira  konsege kumpri duni sira-nia misaun hakmatek iha Timor.

“Hosi Funu Golfu nian, forsa internasionál ida ne’e mak simu mandatu forte no klaru liu to’o ohin loron. INTERFET mai Timor-Leste, ho preparasaun di’ak tebes, ho ekipamentu no kilat ne’ebé adekuadu hodi infrenta ambiente ida ne’ebé la hakmatek, ho risku aas tebes no nakonu ho inserteja,” nia tenik.

Lú Olo haktuir, importante INTERFET tama iha momentu ne’ebá tanba haburas kedas klima seguransa no ambiente estável no seguru liután ba United Nations Transitional Administration in East Timor (UNTAET) hodi bele hala’o ninia kna’ar no mós loke dalan ba ita timoroan hodi bele hakaat ba oin to’o ita restaura ita-nia independénsia iha Maiu 2002.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here