Koordenadór Veteranu Australianu, Michael Stone. Imajen TATOLI/Cipriano Colo

DILI, 20 setembru 2019 (TATOLI) – Koordenadór Veteranu Australianu, Michael Stone, hateten veteranu iha papél oioin no importante iha prosesu dezenvolvimentu nasaun nian.

Hafoin ho delegasaun hosi Austrália partisipa iha Komemorasaun Tinan 20 Prezensa Misaun INTERFET, ohin, iha Paláçio do Governo, Stone deskreve katak veteranu nu’udar sasin ba konflitu, sasin ba terus, sasin ba funu no sasin moris pasadu. Aleinde ne’e, sai sasin prinsipál ba istória, atu prevene konflitu iha futuru no fó omenájen ba ema ne’ebé terus no mate.

Liután ida ne’e, atu fó onra, korajen, toleránsia tuir valór ne’ebé asuwa’in sira komunga durante periúdu luta.

Tanba ne’e, nia admira katak, iha Timor-Leste, veteranu sempre iha papél importante hodi fó ajuda povu, fó ezemplu di’ak ba povu atu kontinua dezenvolve nasaun no promove dame.

Stone subliña, dame tenke mantein, tanba dame hanesan buat ida ne’ebé presiza luta maka’as mak bele hetan.

Nia fó ezemplu katak foin lalais veteranu Timor-Leste fó kontribuisaun boot tebes iha prosesu negosiasaun hodi rezolve disputa Fronteira Marítima ho Austrália, iha ne’ebé halo nia admira loos tanba líder no komunidade veteranu Timor nian partisipa másimu hanesan asuntu nasionál.

Buat ne’ebé Stone haree katak veteranu Timor-Leste (TL) fasilita prosesu ne’e ho disiplina, laran sadia, nunka raan manas, nunka iha konflitu, tanba tau aas sentidu toleránsia, ho vontade di’ak, ikus mai ema hotu bele haree ninia rezultadu.

Ba kestaun ida ne’e, veteranu Austrália kontinua fó korajen hodi tau aas nafatin interese Estadu no povu, nune’e dezenvolve di’ak liután rai ida-ne’e iha futuru.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here