DILI, 19 setembru 2019 (TATOLI)-Timor-Leste ho Australia kontinua aprofunda kooperasaun bilaterál iha area defeza.
Kometimentu ida ne’e afirma liu husi sorumutuk Ministru Defeza Timor-Leste, Filomeno da Paixão de Jesus ho nia omólogu Ministra Defeza Australia, Linda Reynolds, ohin, iha Dili.
Durante sorumutuk ne’e, Governu Australia aprezenta nia interese boot oinsá mak bele ajuda tulun kapasitasaun rekursu umanus iha instituisaun defeza atu bele sai forsa ida profisionál no prontu atu serbí nasaun ho mundu liu husi misaun manutensaun ba pás nian.
Iha sorumutuk entre parte rua ne’e, akompaña mós husi Ambassador Australia mai Timor-Leste, Pitter Robert no delegasaun Ministra Defeza Linda Reynolds.
Pontu neen ne’ebé sai foku diskusaun entre parte rua mak hanesan dahuluk, foka ba formasaun lian Ingles ne’ebé antes ne’e ho formasaun to’o de’it iha nivel ida (1) , governu Australia hakarak loke mós formasaun to’o ba nivel rua (2) hodi kapasita membru FFDTL ho koñesimentu di’ak liu tan. Nune’e mós haruka sarjentu Forsa Defeza Timor-Leste bele halo estudu estratéjia iha Austrália.
Daruak, ko’alia kona-ba oinsá forsa defeza Australia ho Timor-Leste bele la’o hamutuk iha futuru. Datoluk, governu Austrália hakarak apoiu F-FDTL husi komponente Enjeñaria, intermus formasaun ho kualidade di’ak hodi presta serbisu atu apoiu liu-liu komunidade ba serbisu asisténsia umanitária.
Dahaat, ko’alia kona-ba operasaun konjunta iha futuru entre forsa rua iha tasi kosta súl. Dalimak, Australia hakarak apoiu hadi’a Portu Naval, Hera, Dili no ikus liu, daneen, oinsá bele futuru mai bele serbisu konjuntu mós ho rai sira seluk hanesan Amerika, Indonezia no Nova Zelándia.
Jornalista : Nelson de Sousa
Editór : Francisco Simões
