Ministru Reforma Lejizlativa no Asuntu Parlamentares, Fidelis Manuel Leite Magalhães. Imajen/Egas Cristovão

DILI, 20 setembru 2019 (TATOLI) – Ministériu Turizmu, Komérsiu no Indústria (MTKI) koopera ona ho Polísia Nasionál Timor-Leste Munisípiu Dili no Protesaun Sivíl hodi asegura fasilidade sira iha sítiu turístiku ne’ebé konstrui ona.

Fatin turístika ne’ebé Governu hahú reabilita no konstrui mak hanesan Jardín Largo Lesidere, Jardín Sebastião Gomes Motél, 5 Maiu Kolmera, Kristu Rei, João Paulo II inklui B.J. Habibie.

“Kuandu haree ema ruma estraga tenke fó hatene ba parte kompetente hodi nune’e ita hotu-hotu tau-matan tanba fasilidade iha sítiu turístiku ne’e investimentu ita nian no ba ita hotu hanesan sidadaun iha munisípiu Dili atubele uza ba ita hotu nia di’ak”, Ministru Turizmu, Komérsiu no Indústria interinu, Fidelis Manuel Leite Magalhães, afirma iha Jardín B.J. Habibie, Bidaun Santa Ana, ohin.

Ministru Fidelis dehan rezidente sira iha kapitál Dili ne’e tenke konsidera aan nu’udar na’in ba sítiu hirak ne’e hodi hamutuk tau-matan atu kontinua hatudu nia furak hodi atrai vizitante lokál no estranjeiru sira.

“Favór ida uza ba hanesan fatin refreshing no halimar ba labarik sira-nia ho kuidadu no asegura tanba Governu iha planu atu halo tan fatin sira hanesan ne’e iha kapitál Dili iha tinan 2020″, informa.

Nia afirma sei kontinua monta seguransa sira iha sítiu sira ne’ebé Governu harii ona atu asegura fasilidade sira ne’e.

Iha fatin hanesan, Komandante Polísia Munisípiu Dili, Armando Monteiro, dehan Polísia sei kontinua koopera ho Protesaun Sivíl atu asegura no garante fasilidade sira ne’ebé Governu estabelese ona.

“Ami prontu asegura, maibé importante liu mak komunidade hotu-hotu tenke konsidera aan nu’udar na’in mós ba sítiu no fasilidade hirak ne’e”, nia husu.

Jornalista : Florencio Miranda Ximenes
Editora : Maria Auxiliadora

HAKEREK NO HATÁN

Please enter your comment!
Please enter your name here