Primeiru-Ministru,Taur Matan Ruak konverse hela ho Ministra Finansa en-Ezersísiu, Sara Lobo Brites bainhira dirije enkontru revizaun pakote OJE 2020, iha salaun Ministériu Finansa, Aitarak-Laran, Dili, 18 setembru 2019. Imajen dok. TATOLI

DILI, 20 setembru 2019 (TATOLI)—Eis Prezidente Repúblika, José Manuel Ramos Horta, observa katak Primeiru-Ministru (PM), Taur Matan Ruak, tau disiplina maka’as iha ezekusaun orsamentál.

“Ha’u haree Primeiru-Ministru, Taur Matan Ruak nia hakarak tau disiplina maka’as liu iha ezekusaun orsamentál, tanba uluk dezde tempu Governu FRETILIN to’o Governu sira ba kotuk ne’e ita haree de’it ba ezekusaun orsamentál iha ne’ebé balun kontente loos ho %80 iha ezekusaun orsamentál maibé la haree ezekuta saida loos. Agora, ezekusaun orsamentál menus, tanba Taur Matan Ruak, hateten nia lakohi rona ezekusaun orsamentál ne’e hira, maibé hakarak hatene ezekuta saida loos, saida mak halo ona”, Ramos Horta tenik hafoin almosu konfratenizasaun ho eis Komandante INTERFET, Peter Cosgrove, iha Sentru Konvensaun Dili (CCD-sigla portugés), sesta ne’e.

Eis Ministru Negósiu Estranjeiru no Kooperasaun ne’e fó ezemplu, ema ida entrega millaun-ida ba nia para bele ezekuta, nia bele ezekuta hotu ohin kedas, bele sosa karreta lubuk ida, ba pasiar, ba viajen internasionál, entaun ezekuta tiha ona, maibé atu implementa programa ne’e difísil.

“Taur Matan Rauk hakarak hatene programa ne’e ezekuta ka lae. Ne’e mak ministru sira arraska no la autoriza muda orsamentu hosi liña ida ba liña seluk. Tanba ne’e mak ezekusaun menus. La’ós tanba Governu la halo serbisu, maibé tanba rigorozu liu iha sistema aplikasaun ezekusaun orsamentu ne’e”, tenik Ramos Horta.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here