Ministru Transporte no Komunikasaun, José Agostinho da Silva. Imajen António Goncalves

DILI, 20 setembru 2019 (TATOLI) – Ministru Transporte no Komunikasaun (MTK), José Agostinho da Silva, sei dezloka bá Kanadá hodi reprezenta Governu Timor-Leste partisipa iha konferénsia internasionál aviasaun sivíl nian iha 24 setembru ne’e.

“Primeiru-Ministru autoriza ona ha’u para bele bá partisipa konferénsia internasionál aviasaun sivíl, iha Mupil-Kanadá”, ministru informa ba Tatoli hafoin partisipa serimónia tinan 20 prezensa INTERFET (Forsa Internasionál ba Timor-Leste) iha Palásiu Governu, ohin.

Tuir governante ne’e katak aléinde ninian partisipasaun iha konferénsia refere, nu’udar membru Governu ne’ebé reprezenta Primeiru-Ministru Timor-Leste, sei asina mós akordu aviasaun sivil ho nasaun rua.

“Iha ne’ebá ha’u sei asina akordu servisu aéreu nian rua, ida ho Uni Emirate Arab no mós ho nasaun Qatar”, hatete Ministru José Agostinho.

Tuir ministru katak kuandu asina ona akordu ne’e sira bele koopera hodi autoriza sira-nia aviaun bele mai halo operasaun iha Timor-Leste.

“Ho ida ne’e sira bele dezigna sira nian air line ruma mai Timór. Ida ne’e maka daudaun ne’e esforsu husi ami halo hodi rezolve problema tikete aviaun ne’ebé folin kontinua aas”,, dehan nia.

Nia subliña esforsu Governu liuhusi MTK daudaun ne’e ba transporte aéreu mak oinsá bele iha akordu ho nasaun viziña sira liuliu akordu ne’ebé maka hanaran air service agreement. Tanba akordu ne’e laiha maka air lines husi nasaun viziñu sira ne’e laiha dalan para atu mai Timor-Leste.

“Ami iha kompromisu ne’ebé di’ak tebes no husi Primeiru-Ministru nian autorizasaun ami bele halo viajen bá estranjeiru halo akordu ho ita nian maluk nasaun sira”, tenik governante ne’e.

Ministru José Agostinho afirma katak foin daudaun planu atu selebra akordu kona-ba hasa’e frekuénsia semo ho Indonezia no mós ho Singapura no Malázia sobre air service agreement ne’e sei realiza iha tempu badak, nune’e mós ho Xina.

“Ha’u sei dezloka bá Xina para halo akordu air agreement no flay frequency ho Xina nune’e mos ho Brunei Darusalam, Nova Zelándia. Nune’e mos Filipina tanbá hodi bainhira ita iha ona konkordánsia ho sira no agora oinsá maka prosede ba formalizasaun asinatura akordu “, hateten José Agostinho.

Jornalista : Natalino Costa
Editora : Maria Auxiliadora

HAKEREK NO HATÁN

Please enter your comment!
Please enter your name here