Sekretáriu Estadu Juventude no Desportu, Nélio Isaac Sarmento. Imajen Egas Cristóvão

DILI, 20 setembru 2019 (TATOLI) – Sekretáriu Estadu Juventude no Desportu, Nélio Isaac Sarmento husu ba juventude labele lakon esperasa iha prosesu dezenvolvimentu ida ne’e.

Nia dehan, joven mak xave futuru nasaun nian. Tanba ne’e, joven tenke badinas apriende nune’e bele sai joven ne’ebé kontinuadór nune’e bele lori nasaun ne’e ba futuru nabilan.

“Joven sira hotu labele baruk apriende. Labele lakon esperansa iha prosesu dezenvolvimentu nasaun ne’e. Kontinua nafatin apriende atu hetan oportunidade ne’ebé di’ak. Nasaun hein hela joven sira-nia prezensa,” tenik Nélio iha diskursu bainhira partisipa serimónia tomada pose membru Parlamentu Foinsa’e (PF) foun ne’ebé hala’o iha salaun Delta Nova, Comoro, ohin.

Membru Governu ne’e apela mós ba joven sira atu labele sai joven ne’ebé hatene de’it mak online oras 24 nia laran maibé tenke jere tempu ho di’ak tuir espasu atu aproveita oportunidade.

“Imi sei joven. Nurak hela. Imi mak futuru nasaun nian. Labele online to’o haluha aan maibé tenke jere tempu ho di’ak nune’e bele aproveita oportunidade ne’ebé mosu mai,” Nélio enkoraja.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here