Ministru asuntu Veteranu no Pesoál Defeza Australia, Darren Chester, entrega pintura no fotografia 1999-2000 ba Governu TL, sesta (20/09/2019). Imajen/Osória Marques

DILI, 20 setembru 2019 (TATOLI)-Ministru asuntu Veteranu no Pesoál Defeza Australia, Darren Chester, sente priviléjiu no onradu bele marka prezensa iha serimónia tinan 20 prezensa INTERFET iha Timor-Leste (20 setembru 1999-20 setembru 2019) hodi entrega mós pintura ho fotografia 1999-2000 ba Governu Timor-Leste.

Notísia Relevante : Komemorasaun Tinan 20 Prezensa INTERFET Relembra Apoiu Internasionál

Serimónia entrega fotografia no pintura ne’ebé hala’o iha ámbitu ezibisaun   ’20together’  iha Muzeu Rezisténsia, Dili, ba Governu Timor-Leste liu husi Sekretáriu Estadu  asuntu Veteranu no Antigu Kombatente, Gil  da Costa “Oan Soru”.

Darren Chester hateten, tinan ne’e Timor-Leste marka istória importante rua; loron konsultasaun populár ho prezensa INTERFET iha momentu ne’ebé povu Timor-Leste maioria hili ukun rasik aan hodi tuu iha CNRT (Conselho Nacional Resistencia Timorense).

“Ha’u sente priviléjiu hodi bele marka prezensa iha ne’e hodi entrega ba povu TL ezibisaun fotografia no pintura hamutuk 20 iha 1999-2000,” tenik  Darren Chester, MP.

Artista ne’ebé mak pinta obra sentrál sira iha ezibisaun ne’e,  Rick Amor, nomeadu husi Muzeu Funu Australia nian, ninia knaar hanesan halo arkivu ofisial relasiona ho Australia nia partisipasaun iha INTERFET 1999-2000.

Iha momentu ne’ebá, Rick Amor, halo viajen ho Forsa Australia nian ba iha Suai, Maliana no Balibo no nia mós hakfodak bainhira nia haree destruisaun iha tempu ne’ebá.

Rick Amor hateten, “ami inklui fotografia hirak ne’ebé refleta ita-nia parseira kontemporania no fotografia sira ne’e demonstra ita-nia kooperasaun iha area hanesan seguransa, komérsiu no dezenvolvimentu hotu-hotu ne’ebé iha hun ita-nia ligasaun nasaun rua,” Rick Amor hateten.

Iha fatin hanesan Sekretáriu Estadu Gil da Costa “Oan Soru” hateten, ezibisaun ne’e hatudu ba Timoroan no ba mundu katak, Timor iha istória no Timoroan bele dezenvolve nia istória rasik.

Jornalista : Osória Marques

Editór       : Francisco Simões

HAKEREK NO HATÁN

Please enter your comment!
Please enter your name here