Prezidente Repúblika, Francisco Guterres Lú Olo, kaer liman ho eis Komandante INTERFET, Peter Cosgrove, iha Komemorasaun Tinan 20 Misaun INTERFET iha Timor-Leste. Imajen Mídia PR

DILI, 20 setembru 2019 (TATOLI) – Prezidente Repúblika, Francisco Guterres Lú Olo, agradese ho fuan ne’ebé kle’an hodi hateten katak jestu solidariedade hosi The International Force East Timor (INTERFET) sei metin iha timoroan hotu nia fuan.

Nia fó hanoin katak Estadu Timor-Leste hamosu Medalla Solidariedade Timor-Leste atu rekoñese mós militár estranjeiru sira ne’ebé simu mandatu atu asisti operasaun Defeza no Seguransa  durante periúdu INTERFET, entre 20 setembru 1999 no 28 fevereiru 2000.

Ba komandante asuwa’in INTERFET nian, Lú Olo haktuir, Estadu Timor-Leste kondekora ho Kolár Órden Timor-Leste, iha 2009 no ho Grande Kolár Órden Timor-Leste, iha 2016, bainhira kaer ona kna’ar nu’udar Governadór-Jerál Austrália.

“Órden ne’e harii hodi rekoñese, ho prestíjiu no dignidade, nasionál no estranjeiru sira, ne’ebé liuhusi sira-nia atividade profisionál, sosiál no liuhusi atu eróiku  ka  domin ba ema, fó benefísiu boot ba Timor-Leste, timoroan sira ka ba umanidade,” tenik Xefe Estadu iha Komemorasaun Tinan 20 Prezensa Misaun INTERFET iha Timor-Leste, iha Palácio do Governo, sesta ne’e.

Lori Repúblika no povu Timor-Leste nia naran, Lú Olo fó agradese dala ida tan ba militár sira-ne’ebé fó aan tomak durante periúdu INTERFET no hato’o saudasaun espesiál ba Jenerál  Peter Cosgrove.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here