Eis Prezidente Repúblika, José Manuel Ramos Horta. Imajen Tatoli/António Gonçalves

DILI, 20 setembru 2019 (TATOLI)—Eis Prezidente Repúblika, José Manuel Ramos Horta, rekoñese difísil rezolve inserteja polítika iha rai-laran.

“Ha’u tenta diálogu ho hotu-hotu maibé difísil tebes. Atu haree diálogu oinsá kuandu instituisaun hanesan Parlamentu Nasionál dezafia fali Prezidente Repúblika ka la husik Prezidente Repúblika ba partisipa Asembleia Jerál Organizasaun Nasaun Unida (ONU) iha Nova Iorke”, dehan nia hafoin almosu amizade ho eis Komandante INTERFET, Peter Cosgrove, iha Sentru Konvensaun Dili (CCD-sigla portugés), sesta ne’e.

Nia haktuir, iha nasaun ne’ebé de’it, órgaun soberanu sira sempre serbisu hamutuk, maibé iha Timor-Leste fila kotuk ba malu fali.

Eis Ministru Negósiu Estranjeiru no Kooperasaun ne’e hateten Parlamentu Nasionál tenke hala’o kna’ar hanesan reprezentante povu.

“Ne’e duni, ita agora to’o iha situasaun ida ne’ebé ita bele hateten halimar fali ho mandatu Prezidente nian atu reprezenta Estadu iha rai-li’ur. Ne’e tristi. Signifika, diálogu ba oin sei susar liután”, informa Eis Xefe Estadu ne’e.

Maski nune’e, hanesan Premiadu Nobel ba Pás, Horta hakarak buka halo diálogu para hetan konsensu nasionál nune’e órgaun soberania sira bele serbisu hamutuk.

Jornalista: Evaristo Soares Martins  

Editór: Xisto Freitas

HAKEREK NO HATÁN

Please enter your comment!
Please enter your name here