Delegasaun forsa Austrália partisipa iha Komemorasaun Tinan 20 Misaun INTERFET iha Timor-Leste, ohin, iha Paláçio do Governo. Imajen: TATOLI

DILI, 20 setembru 2019 (TATOLI) – Militár Austrália kompostu husi soldadu, sarjentu no ofisiál ne’ebé integra iha Misaun International Forces for East Timor (INTERFET), United Nations Transitional Administration in East Timor (UNTAET) no seluk-tan, hahú hosi tinan 1999 liubá, hamutuk 30.000 resin.

Koordenadór Veteranu Australianu, Michael Stone,  hateten primeiru grupu ne’ebé destakadu uluk mai Timor-Leste (TL) iha loron 20-22 setembru 1999, hamutuk 5000 resin.

Hafoin iha kada fulan ne’e halo rotasaun, troka malu, to’o ikus forsa Australianu atinje 30.000 resin ne’ebé promove pás iha Timor.

“Austrália oferese ninia militár lubuk ida hala’o misaun ne’ebé boot liu iha Timor, kompara ho misaun hafoin Segunda Gerra Mundial”, Stone haktuir ba Agência Tatoli iha Paláçio do Governo, sesta ne’e.

Nia dehan, númeru militár ne’e, ikus mai fó impaktu boot ba komunidade militár Austrália, inklui veteranu no povu Austrália tomak.

Kona-ba númeru militár Australianu ne’ebé mate iha Timor durante hala’o misaun pás, Stone relata katak liu na’in sanulu.

Hosi númeru ne’e, balun tanba moras, balun kanek no balun hetan problema hafoin misaun pás ramata iha Timor.

Militár no veteranu Australianu barak mak to’o agora arrepende no laran moras tanba iha memomentu ne’ebá la konsege mai Timor sedu, iha ne’ebé bainhira to’o mai ema barak mate, uma barak liu mak hetan estragu no violasaun oioin mosu husi invazór sira.

“Ha’u-nia maluk forsa Australianu sira to’o agora sei laran moras tanba la konsege salva timoroan barak ne’ebé ema oho”, Stone espresa.

Maski nune’e, Michael Stone haktuir maioria veteranu Australianu sira ne’ebé marka prezensa iha Komemorasaun Tinan 20 Prezensa INTERFET sente kontente bainhira haree progresu dezenvolvimentu ne’ebé akontese iha Timor-Leste (TL).

Aleinde ne’e, veteranu sira mós orgullu tanba haree timoroan sira moris ho kontente, povu ki’ik sira hadomi malu no moris iha armonia nia laran.

Michael hameno ba povu Timor-Leste atu kontinua hadomi malu nafatin, kaer metin prinsípiu ne’ebé asuwa’in sira komunga hodi nune’e timoroan sira bele moris di’ak liután iha futuru nakonu ho domin, pás, estabilidade no prósperu.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here