DILI, 20 setembru 2019 (TATOLI) – Juvencio Maria Soares, joven iha suku Bidau Santa Ana, espresa nia sentimentu kontente ho “Feira Loraik” ne’ebé mak realiza iha Jardín B.J. Habibie tanba fó animasaun ba abitante Dili hodi bele hakribit konflitu, kontribui ba pás no estabilidade.

“Loron agora ita kontente tanba iha tinan 20 ba kotuk ita triste no iha susar nia laran, ne’ebé importante iha espozisaun no animasaun hanesan ne’e atu juventude sira bele haluha no hapara konflitu”, nia dehan bainhira partisipa iha abertura espozisaun loraik ne’ebé realiza hodi komemora Loron Konsulta Populár ba dala-20 no Misaun INTERFET (Forsa Internasionál ba Timor-Leste), iha Jardin Bidau, ohin.

“Feira Loraik” ne’e atu promove produtu lokál, kulinária, artezanatu, kultura, inklui diretamente fó benefísiu ekonómiku ba negosiante sira.

Ministru Turizmu, Komérsiu no Indústria interinu, Fidelis Manuel Leite Magalhães, hatete iha tinan 20 ba katuk (1999) iha territóriu Timor-Leste liuliu iha Dili, populasaun sira hetan terus, susar no balun lakon no mate.

“Agora tinan 20 liu tiha ita mai hamutuk iha parke B.J. Habibie ida ne’e, ita hotu-hotu no labarik sira kontente no halimar ho ksolok, ne’e hanesan avansu boot ida se ita kompara ho tinan 20 liubá”, Ministru Fidelis afirma bainhira loke “Feira Loraik” iha jardín B.J. Habibie ne’e.

Tanba ne’e, Ministru Fidelis dehan Governu hakarak duni hala’o eventu oin-oin iha selebrasaun loron Konsulta Populár ba dala 20 no Misaun INTERFET hodi fó ksolok no kontente ba populasaun sira iha territóriu tomak liuliu Munisípiu Dili.

“Governu sei kontinua halo esforsu hotu para que Dili no Timor-Leste bele sai fatin ne’ebé seguru liu ba nia sidadaun sira”, katak.

Nune’e, nia informa MTKI tau ona planu iha 2020, atu kontinua loke espasu tasi ibun nian hodi loke fatin Marina Square hahú husi tasi ibun Praia dos Coqueiros kontinua ho área tasi ibun otél Arbiru nia oin.

“Ita hakarak Dili sai fatin ida ne’ebé seguru liuliu iha fatin rekreiu no fatin ida deskansa no labarik sira bele halimar haksolok hodi kria pás no estabilidade”, nia afirma.

“Feira Loraik” iha Jardín B.J. Habibie ne’e, kada semana halo dala rua iha loron sesta no sábadu ho durasaun fulan ida hahú husi loron 20 setembru to’o 20 outubru tinan ne’e, ne’ebé hala’o ho orsamentu rihun $35.

Notísia relevante : Liuhosi Feira Bele Sukat Kapasidade Timoroan Promove Produtu no Identidade TL ba Mundu

Jornalista : Florencio Miranda Ximenes
Editora : Maria Auxiliadora

HAKEREK NO HATÁN

Please enter your comment!
Please enter your name here