Diretór Eskola Sekundária Tekníka Vokasionál-Grupu Teknolojia Indústria (ESTV-GTI) Bekora, Francisco Guterres.

DILI, 20 setembru 2019 (TATOLI)–Diretór Eskola Sekundária Téknika Vokasionál, Grupu Tékniku no Indústria (ESTV-GTI), Becora, Francisco Guterres konsidera katak profesór sira ne´ebé destaka iha ne´e sei menus tanba ne´e husu ba Ministériu Edukasaun, Juventude no Desportu (MEJD) atu, to´o 2020, bele aumenta tan.

“Eskola ESTV-GTI Becora agora daudaun iha profesór hamutuk 86 pesoas ida ne’e mós seidauk bele responde nesesidade estudante sira nian kona-ba matéria prátika no teória. ESTV-GTI ne’e iha área 6 inklui matéria jerál hanesan matemátika, fízika no kímika. Ne’e duni profesór 86 ne’e labele responde hotu matéria sira ne’e,” informa Diretór ESTV-GTI, Francisco Guterres ba ajensia TATOLI iha ninia kna’ar fatin ESTV-GTI Becora, horseik.

Nia esplika, dala ruma ema balun dehan profesór 86 destaka iha ESTV-GTI ne’e barak tebes: “Maibé ha’u dehan seidauk to’o. Presiza aumenta tan númeru profesór”.

Razaun ESTV presiza aumenta tan profesór, Diretór Francisco Guterres esplika katak kada departamentu ida loloos ne’e tenke prienxe ho profesór hamutuk 15 maibé agora daudaun ne’e departamentu neen ne’e foin mak hetan profesór na’in neen to’o ualu de’it.

Profesór ne´e informa, iha ESTV-GTI Becora ne’e aplika sistema modulár signifika kada profesór labele lori matéria liuhusi rua. Maibé, realidade profesór tenke komprimenta hodi responsabiliza matéria prátika ho teória hotu. Entaun, oráriu ba profesór ida oras haat de’it maibé sira prienxe liu tiha oras ne’ebé terminadu ona.

“Entaun ami husu ona ba MEJD iha tinan 2020 ne’e tenke halo rekrutamentu ba profesór sira hodi kompleta númeru ne’ebe ami presiza,” nia dehan.

Responsável másimu ESTV-GTI, Becora ne´e hateten, ESTV-GTI loloos ne’e tenke iha profesór teória no prátika ketak atu nune’e bele ajuda prosesu aprendizazen ne’e la´o di´ak liután hodi tulun profesór ninia preparasaun ba matéria no mós ajuda estudante sira atu bele aproveita.

“Tanba profesór ida hanorin teória no prátika dala ida de’it difikulta ninia tempu. ESTV kuandu prátika la´ós oras ida ka rua de’it maibé loron tomak. Tan ne’e mak eskola sujere ba Ministériu kompotente atu toma konsiderasaun ba kestaun ne’e,” konklui Manorin na´in, Francisco Guterres.

Jornalista : Tomé Amado
Editór         : Rafy Belo

HAKEREK NO HATÁN

Please enter your comment!
Please enter your name here