Ministru Negósiu Estranjeiru no Kooperasaun, Dionísio da Costa Babo Soares. Imajen TATOLI/Cipriano Colo

DILI, 19 setembru 2019 (TATOLI) – Prezidente Repúblika, Francisco Guterres Lú Olo, iha audiénsia ho Ministru Negósiu Estranjeiru no Kooperasaun, Dionísio da Costa Babo Soares, informa katak laiha intensaun atu impede hodi fó pose ba embaixadór sira.

Audiénsia ne’e realiza iha Palásiu Prezidente Nicolau Lobato,  Bairru Pité, Dili, ohin.

Dionísio hateten nu’udar líder másimu diplomasia ninian, Xefe Estadu husu Governu atu tetu lista ne’e.

Hafoin enkontru ho Prezidente Repúblika, Ministru Dionísio Babo hateten katak nia hetan garantia hosi Prezidente Repúblika nu’udar líder másimu diplomasia nian relasiona ho lista embaixadór ne’ebé seidauk hetan pose tanba ne’e interese Estadu nian no husu Governu atu tetu.

Ministru ne’e haktuir katak hafoin enkontru dahuluk ho Xefe Estadu, Ministériu Negosiu Estranjeiru halo tiha ona ajustamentu ba lista naran embaixadór no haruka tiha ona ba Konsellu Ministru atu aprova.

Dionísio Babo mós hatutan katak ne’e nu’udar kna’ar Konstitusionál Prezidente Repúblika atu aprova lista embaixadór sira.

Hosi lista embaixadór na’in-16, Prezidente Repúblika fó ona pose ba embaixadór na’in-tolu mak hanesan Olímpio Branco ba Embaixadór Brazíl, Isilio Coelho ba Estadu Unidu no Lisualdo Gaspar ba Nova Zelándia.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here