Sekretáriu Jerál Federasaun Basketból Timor-Leste, Igildo Tilman. Imajen espesiál

DILI, 19 setembru 2019 (TATOLI) – Sekretáriu Jerál Federasaun Basketból Timor-Leste (FBTL), Igildo Tilman, informa tinan ne’e labele realiza liga basketból tanba seidauk hetan despaisu hosi Governu.

“Kona-ba Liga Basketból, tinan ne’e dalaruma la realiza tanba seidauk hetan despaisu ruma hosi Governu, tanba ita hare hela de’it fulan hira imposível ita atu realiza liga ida”, tenik Igildo Tilman ba Agência TATOLI iha Aeroportu Internasionál Prezidente Nicolau Lobato, kinta ne’e.

Nia esplika, liga hala’o de’it bainhira hetan despaisu ona hosi Governu liuhosi Sekretaria Estadu Juventude no Desportu (SEJD) hodi apoiu orsamentu ruma mak bele realiza jogu.

Sekretáriu Jerál haktuir, tinan hirak liubá kotuk, FBTL hala’o liga tanba hetan despaisu hosi SEJD hodi fó apoiu orsamentu.

Iha tinan rua tuir malu ona mak federasaun ne’e labele realiza liga basketból nune’e, bele prepara atleta ne’ebé di’ak.

Alende ne’e, novembru mai ne’e federasaun sei hala’o mós kongresu, nune’e bele hili fali membru foun hodi lidera FBTL ba tinan haat ba oin, tanba estrutura tuan ramata ona sira nia mandatu tinan ida ne’e.

Jornalista: Hortençio Sanchez

Editór: Xisto Freitas

 

HAKEREK NO HATÁN

Please enter your comment!
Please enter your name here