Diretór Unidade Jestaun Projetu Portu Tibar, Rui Soares, esplika hela dezeñu kontrusaun Portu Tibar ba eis Primeiru-Ministru, Kay Rala Xanana Gusmão, iha Portu Tibar. Imajen Eugénio Pereira.

LIKISÁ, 18 setembru 2019 (TATOLI) – Empreza China Harbour ne’ebé halo konstrusaun ba Portu Tibar fó ona serbisu ba timoroan feto no mane kuaze-200 resin ona.

“Daudaun timoroan ne’ebé serbisu iha Portu Tibar ne’e kuaze 200-resin ona ne’ebé liu ona metade kuaze porsentu 57 no posibilidade sei aumenta tan traballadór timoroan”, Diretór Unidade Jestaun Portu Tibar, Rui Soares, ba ajénsia Tatoli iha Portu Tibar, kuarta ne’e.

Rui Soares friza timoroan feto no mane ne’ebé serbisu iha Portu Tibar ne’e iha área oin-oin hanesan, tékniku enjeñaria, operadór ka kaer mákina pezada sira, asuntu ambientál, no seguransa.

Nia dehan, kompañia China Harbour nia trajetu durante konstrusaun ne’e timoroan tenke mínimu porsentu 70 ho ema estranjeiru porsentu 30. “Ita haree kuandu to’o puncak konstrusaun ne’e bele fó servisu ba timoroan 800”, nia espera.

Nia afirma traballadór timoroan ne’ebé serbisu iha Portu Tibar barak liu kompara ho traballadór estranjeiru hamutuk 100-resin.

Maski, liu ona trajetu katak durante tinan tolu sei kria oportunidade traballu ba abitante lokál hamutuk 150, maibé iha posibilidade sei loke tan oportunidade ba timoroan seluk.

Antes ne’e, Governu hamutuk ho Timor Port, iha loron 14 juñu, tau fatuk-dahuluk ba konstrusaun Portu Tibar nian. Konstrusaun ba ekipamentu ho nivel mundiál ne’e, sei hala’o iha tinan 3 nia laran, ba infraestrutura prioritária ida ne’ebé identifika ona iha Planu Estratéjiku Dezenvolvimentu Timor-Leste nian tinan 2011-2030, ne’ebé Governu Konstitusionál VI nian fó ona ninia esforsu di’ak sira.

Notísia relevante : PM Lansa Ona Konstrusaun Projetu PPP Portu Tibar

Portu Tibar Sei Hari Ho Osan Millaun U$490

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here