Prezidente Parlamentu Nasionál, Arão Noé de Jesus da Costa Amaral. Imajen Tatoli/António Gonçalves

DILI, 19 setembru 2019 (TATOLI) – Prezidente Parlamentu Nasionál (PPN), Arão Noé de Jesus da Costa Amaral, konsidera polítika ne’ebé Timor-Leste opta ba rekonsialiasaun la’ós atu haluha istória.

PPN ko’alia asuntu ne’e, relasiona ho selebrasaun tinan 20 International Force for East Timor (INTERFET) ne’ebé sei selebra aban (20/09) no konsidera loron ne’e importante tanba INTERFET to’o Timor-Leste hodi salva populasaun no edifísiu iha setembru 1999.

‘’Ita hotu-hotu reflete atu hateke ba oin, agora iha faze rekonsiliasaun, dezde ita restaura ita-nia independénsia no opta rekonsiliasaun hodi sai fatór determinante ba ita-nia vizaun ba oin, maibé laós atu haluha istória, tanba istória hela nafatin ho istória. Ita hotu-hotu hanoin hikas katak saida mak akontese iha kotuk, labele akontese tán’’, dehan nia ba jornalista sira, iha Parlamentu Nasionál (PN), kinta ne’e.

Tanba ne’e, tuir Arão Noé loron ne’e importante atu-bele komemorasaun, hodi hanoin hikas fali istória sira ba kotuk no akontesimentu sira koñesidu ho ‘Setembru Negro’ iha 1999, atu-bele reflete ba oin katak saida mak akontese liubá hanesan istória.

Nia dehan tan, timoroan hotu ho Indonézia hanesan país viziñu, tanba ne’e refleta hamutuk liuhosi selebrasaun loron INTERFET nian.

Biban ne’e, PPN mós hato’o boa-vinda ba Jenerál Peter John Cosgrove, ne’ebé marka mós prezensa iha komemorasaun ne’e.

Arão Noé mós agradese ba forsa INTERFET sira ne’ebé tama iha ekipa ne’ebé mai Timor-Leste iha 20 setembru 1999.

‘’Mai kontribui no rekupera fali páz no estabilidade iha Timor-Leste, parabéns ba sira no ba timoroan sira’’, nia akresenta.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here