Xefe Estadu Maiór Jenerál FALINTIL-FDTL, Majór Jenerál Lere Anan Timur ho Embaixadora Estadus Unidus Amerika mai Timor-Leste, Katleen Fitzpatrick no Komandante Primeiru Divizaun Forsa Austrália Majór Jenerál Justin “Jake” Elwood partisipa serimonia enseramentu ezersisiu Harii Hamutuk iha Komandu F-FTL, Metinaro Dili, kinta (19/09/2019). Imajen/Eugénio Pereira

METINARO, 19 setembru 2019 (TATOLI)-Xefe Estadu Maiór Jenerál FALINTIL-Forsa Defeza Timor-Leste (F-FDTL), Majór Jenerál Lere Anan Timur, hateten, prezensa Forsa INTERFET iha loron 20 setembru 1999, nu’udar grasa ida ne’ebé oferese husi Organizasaun Nasoins Unidas (ONU) hodi mai hakotu funu iha Timor.

Notísia Relevante : Prezensa INTERFET Hapara Matan-Been

“Ha’u hanoin katak, presiza forsa INTERFET 1999 maka hakotu konflitu funu entre Timoroan, tanba depois de votasaun 30 Agostu 1999 situasaun iha fatin hotu-hotu manas. Se la iha intervensaun husi ONU karik, ita dehan sira ne’ebé mate ona, sei mate liután. Mais ho INTERFET nia intervensaun ha’u bele dehan sira hamenus duni risku konflitu funu sira ne’ebé ita prevee tiha ona,” hateten Lare ba jornalista, ohin,  iha Kuartél Jerál F-FDTL, Metinaro, Dili.

Komandante FALINTIL ne’e lori povu nia naran hato’o agradese boot ba nasaun hotu- hotu ne’ebé hala’o misaun manutensaun dame iha ONU mai Timor-Leste.

Notísia Relevante : INTERFET Lori Esperansa Foun ba Timoroan

Iha fatin hanesan, Embaixadóra Estadus Unidus Amerika mai Timor-Leste, Katleen Fitzpatrick, hato’o parabéns ba povu no militár F-FDTL hamutuk ho ONU ne’ebé  selebra misaun INTERFET ba dala-20 (20 setembru 1999-20 setembru 2019).

Embaixadóra Katleen fó lembra iha 1999, Forsa Amerika 5.000 ho ró boot militár no aviaun 100 mak halo misaun dame hale’u Timor-Leste ho forsa ONU nian seluk.

“Ita sei selebra aniversáriu kooperasaun INTERFET ba dala 20, Estadus Unidus Amerika ho orgullu partisipa ona iha kooperasaun INTERFET. Durante operasaun INTERFET Amerika fornese membru 5.000, ró militár boot hitu (7) no aviaun 100 hodi estabelese seguransa no ajuda forsa sira ba rekonstrusaun ba dame,”  Katleen haklaken.

Ho tinan 20 INTERFET  ne’e, Embaixadóra Katleen deklara, Forsa Amerika kontinua hatudu espíritu kolaborasaun hametin no kontinua apoiu treinamentu no ajuda nafatin serbisu iha kooperasaun ezersísiu Harii Hamutuk multi nasionál hodi dezenvolve Timor-Leste.

“Parabéns ba Timor-Leste militár no povu, ha’u defeza susesu ba imi hotu,” tenik nia.

Governu Amerika haruka ona Kolonel Scott Burnside, Reprezentante Senior Militár EUA ne’ebé mai atu partisipa iha aniversáriu INTERFET ba dala-20. Nia mak Xefe USINDOPACIFIC ba Divizaun Polítika Sudeste Ázia nian ne’ebé hasoru ona Forsa naval SEABEES hodi ko’alia kona-ba projetu sira ne’ebé hala’o daudaun.

“Ami nia Forsa Naval SEABEES lakleur tan sei selebra aniversáriu ba dala-10 no ami nia ekipa unidu nafatin atu kontinua konstrui projetu enjeñaria sira hodi apoia governu no povu Timor-Leste,” diplomata husi Estadu Unidus Amerika ne’e tenik tan.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here