Tais Timor Husi Municipio Manufahi. Imajen/TATOLI

DILI, 19 setembru 2019 (TATOLI)—Ohin, Ministériu Turizmu Komérsiu no Indústria (MTCI) entrega Produtu  Arte no Kultura husi rezultadu kompetisaun grupu “Arte Soru Tais” no Grupu “Kahe Tais” ba Centro Nacional Chega (CNC) atu konserva hanesan objetu kulturál ba vizitante sira atu haree.

MTCI hola parte iha Komisaun Organizadora Loron Konsulta Populár ba dala-20 nu’udar komisaun ne’ebé sub-sesaun husi sesaun programa ne’ebé lidera husi Centro Nacional Chega hodi hola parte ba iha festivál ba Indústria Tais.

“Ohin, Minitériu Turizmu Comersiu no Industria (MTCI) entrega Produtu  Arte no Kultura husi rezultadu kompetisaun grupu “Arte Soru Tais” no Grupu “Kahe Tais” ba Centro Nacional Chega (CNC) atu konserva hanesan objetu kulturál,” dehan Diretór Jerál Diresaun Indústria iha MTCI, António da Costa, ba Jornalista Ajênsia TATOLI iha Edifísiu  Centro Nacional Chega, Antigu Komarka, Balide, Dili, kinta (19/9/2019).

Diretór ne’e realsa, festivál ba indústria tais ne’e kompostu husi grupu rua mak grupu “Arte Soru Tais” kompostu husi munisípiu 11 no grupu “Kahe Tais” kompostu husi munisípiu neen (6).

Husi kompetisaun arte no kultura ne’e, Minisípiu Same ne’ebé hola parte ba iha grupu “Kahe Tais” maka sai vensedór ba kompetisaun ne’e.

Aleinde ne’e, nia hatutan, ba atividade sira ne’e MTCI mós prepara ho video ida hodi sai hanesan arkivu ida ne’ebé iha futuru mai sai hanesan referénsia ida ba jerasaun foun no ba bainaka estranjeiru sira.

“Ami mós halo video ida ba atividade ne’e, hanesan kontinuasaun ka referénsia katak husi programa ne’e ba futuru oinsá atu hadi’a liután kooperasaun entre instituisaun sira hodi mantein promove ita-nia kultura ba mundu. Tanba ne’e, ohin, ami lori rezultadu husi kompetisaun ne’e, atu nune’e bele sai hanesan objetu kulturál ida ba vizitante sira,” nia dehan.

Entretantu, festivál tais ne’e realiza tanba MTCI koopera hamutuk ho Fundasaum Alola, Australian Aid, Minstériu Edukasaun, Sekretáriu Estadu Arte no Kultura, ne’ebé hala’o iha loron 25 fulan Agostu no remata tiha ona iha loron 29 fulan Agostu tinan 2019 liu ba ne’e.

Jornalista: Nelia Borges

Editór .     : Rafy Belo

HAKEREK NO HATÁN

Please enter your comment!
Please enter your name here