Ministru Obras Públikas, Salvador Soares dos Reis Pires. Imajen António Goncalves.

DILI, 19 setembru 2019 (TATOLI) – Ministériu Obra Públika (MOP), husu orsamentu adisionál iha Komité Revizaun Orsamentu Polítika (KROP) ho montante millaun $43-resin.

“Ami simu pakote fiskál millaun $58 ba bens servisu ho saláriu vensimentu. Ami husu tan adisionál millaun $43,787,040.00 ba kapitál menór ne’e ba liu despeza no manutensaun sira”, Ministru Obra Públika, Salvador Eugénio Soares dos Reis Pires, afirma iha Ministériu Finansa, Aitarak-Laran, ohin.

Husi proposta adisionál ne’e, nia dehan aloka millaun $12 hodi foku ba manutensaun estrada rurál ho pakote 99 ho totál kilómetru 500-resin, manutensaun ba estrada urbana ne’ebé ho kilómetru 500, estrada munisipál kilómetru 400 no estrada nasionál ho kilómetru 500-resin.“Ne’ebé iha tinan oin atu halo manutensaun no konstrusaun ba estrada sira ne’e”, ministru informa.

Ba orsamentu kapitál dezenvolvimentu iha 2020, MOP prevee millaun $40 atu halo projetu foun no projetu ne’ebé en kursu hela iha kapitál fundu infrastrutura hanesan projetu estrada rurál foun hamutuk pakote 45 iha territóriu tomak.

“Governu nia meta ne’e iha tinan ida nia laran pelumenus konstrui estrada rurál kilómetru 500 to’o 600 tanba iha tinan oin ita atu halo ona estrada kilómetru 150 to’o 200”, katak.

Ba estrada munisipál, nia dehan iha tinan oin konstrui kilómetru 400-resin ho ponte kuaze 16, sira ne’ebé halo ona dezeñu detallada atu OJE 2020 aprova hahú konstrui ona.

Ba eletrisidade, Ministru Salvador salienta iha tinan oin prevee osan atu rekruta tan pesoál téknika sira  hamutuk 120 ba territóriu tomak atu fó atendimentu ho lais liu. “Tanba ita-nia atendimentu ne’e manuál ne’ebé kuandu ahi mate iha tempu kalan ne’e, ita buka leno lampra tuir dalan ne’ebé ema menus atu halo rekuperasaun ne’e lori oras barak”, ministru salienta.

Orsamentu adisionál ne’e mós atu responde ba nesesidade hanesan halo manutensaun ba liña transformadór alta tensaun ba iha sub-estasaun iha munisípiu hotu.

Iha 2020, MOP halo ona transformasaun ba mobile iha liña distribuisaun ba transmisaun ba umakain sira ne’ebé kuandu avaria kontinua fornese enerjia ba populasaun.

Nia dehan daudaun ne’e, iha populasaun porsentu 17 mak seidauk asesu liña distribuisaun, ne’ebé iha tinan ne’e halo ona planu 32 ne’ebé orsamentu hatama ona iha fundu infrastrutura nune’e 2020 halo ona implementasaun.

Ba suku ka umakain ne’ebé nia lokalizasaun dook husi suku, iha tinan oin prevee mós orsamentu millaun $1 atu kontinua instala no manutensaun enerjia renovavel liuliu solár painél.

Ba bee, nia afirma iha fundu infrastrutura prevee millaun $13-resin hodi implementa sistema bee integradu liuhusi kooperasaun ho Ministériu Estatál no hetan asisténsia téknika husi Governu Austrália.

“Ba bee ne’e ami iha projetu lubuk ne’ebé halo preparasaun estudu no dezeñu enjeñaria detallada iha Komisaun Nasionál Aprovizionamentu atubele finaliza kustu estimativa hodi tama faze implementasaun hanesan Dili, Vikeke, Baukau, Same no Lospalos”.

Ba Munisípiu Aileu, Ainaru no Suai, Bobonaru no Ermera inklui seluk ne’ebé seidauk iha planu mestre sei kontinua halo estudu no dezeñu detallada hodi implementa fali iha 2021.

“Sistema bee integradu ne’e ita hakarak eleva kapasidade rezervatóriu, sentraliza no instala postu rezervatóriu iha suku sira hodi dada ba komunidade sira-nia uma”, dehan nia.

Kona-ba abitasaun, nia dehan daudaun ne’e sei iha faze preparasaun ba akizisaun rai ne’ebé projetu ne’e implementa uluk iha kapitál Dili iha 2021, ho modalidade Parseria Públiku-Privadu (PPP).

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here