Ministru Negósiu Estranjeiru no Kooperasaun, Dionísio da Costa Babo Soares. Imajen Tatoli/António Gonçalves

DILI, 19 setembru 2019 (TATOLI)-Ministériu Negósiu Estranjeiru no Kooperasaun (MNEK) propoin tan orsamentu adisionál millaun 10 ba Ministériu Finansa (MF) hodi haforsa tan serbisu instituisaun nian no polítika esterna.

“Iha pakote fiskál sira (MF) fó 24 itál, haree ba nesesidade, ami husu tan se bele, aumenta tan purvolta 10 milloens tanba Ministériu Estranjeiru ne’e ita boot sira (jornalista sira) hatene dezde 2010 to’o agora seidauk iha aumenta, nein buat ida,” esplika Ministru Negósiu Estranjeiru no Kooperasaun, Dionísio da Costa Babo Soares ba jornalista sira iha edifísiu Ministériu Finansa, Ai-tarak laran, Dili, ohin.

“Ami ko’alia, ami husu aumenta tan. Ami husu uitoan. Se akomoda ne’e di’ak tebes,” reforsa tan diplomata timoroan ne’e.

Eis-Ministru justisa iha Sestu Governu Konstitusionál ne’e informa, dezde 2010 to’o agora orsamentu hanesan de’it, tinan-tinan. “Ezemplu, iha li’ur ne’ebá, diplomata sira simu hanesan de’it, karreta sira ne’e mós tinan 10 hotu ona, komputadór sira, meza, kadeira sira ne’e aat hotu ona, iha embaixada sira ne’e”.

“Ita tenke presiza projeta para depois buat ida alugér, renda sira embaixada sira ne’e mós tinan-tinan sa’e beibeik, selu tan taxa, ne’ebé ita tenke aumenta para selu embaixada sira ne’e,” tenik diplomata timoroan ne’e.

Diplomata timoroan ne’e informa tan, iha ne’e ita-nia diplomata sira barak ne’e atu reforma hotu ona. “Tanba ne’e, ami husu osan uitoan, se bele aumenta mós rekrutamentu foun ba diplomata sira iha tinan oin mai, se ida ne’e mak aprova”.

“Tanba se ita rekrutamentu agora, tinan oin, tinan lima ou neen mak ita foin rekrutamentu fali tanba ita tenke prepara sira sai tiha diplomata ne’ebé di’ak ba ita-nia país. Ne’ebé, ami tetu orsamentál ne’e, ami husu purvolta 35 milloes. Ho ida ne’e hotu tinan oin tun fali ona tanba ita la hola fali buat sira ba embaixada sira ne’e, depois to’o tinan lima ou neen mak foin aumenta fali,” nia esplika.

Ministru Negósiu Estranjeiru no Kooperasaun ne’e esplika, tuir orsamentu adisionál ne’e prioridade boot liu mak rua; ida ba institusionál, fortalesimentu institusionál interna ninian; reforsa divizaun sira-nia serbisu, hasa’e kualidade serbisu.

Ida fali mak kondisaun polítika esterna, ne’e mak reprezentasaun iha li’ur. Ida nível bilaterál nian hanesan ho nasaun ida-idak iha nivel multilateral nian. “Hanesan ASEAN, organizasaun internasionál komérsiu, CPLP, ho tan organizasaun mundiál seluk ne’ebé ita halo parte hanesan UNESCO;  buat sira ne’e hotu”.

 Jornalista : Nelia Fernandes

Editór      : Rafy Belo 

HAKEREK NO HATÁN

Please enter your comment!
Please enter your name here