Edifisíu MNEK. Imajen/Espesiál

DILI, 19 setembru 2019 (TATOLI) Ministériu Negósiu Estranjeiru no Kooperasaun (MNEK), liu husi Gabinete Sekretáriu-Jerál, informa katak MNEK, nu’udar instituisaun Governu ne’ebé koordena prosesu Timor-Leste nia adezaun ba ASEAN, nomeia ona Liaison Officer ka Ofisiál Ligasaun ida hodi bele ajuda fasilita liu tan komunikasaun ne’ebé di’ak ho Sekretariadu ASEAN no mós ho Membru Estadu ASEAN sira. Liaison Officer ne’e dezloka ona ba Indonézia no sei rezide iha Timor-Leste nia Embaixada iha Jakarta durante nia mandatu.

Liuhusi oportunidade ne’e, Ministériu mós hakarak atu klarifika katak até a data, seidauk iha nomeiasaun ba pozisaun “Sekretáriu-Jerál Timor-Leste ba ASEAN.”

Liaison Officer nia papél mak atu fasilita komunikasaun entre Governu Timor-Leste ho ASEAN, liu-liu liga ho atualizasaun informasaun ba servisu no preparasaun téknika sira ne’ebé mak Timor-Leste halo ona hodi adere ba ASEAN.

Nomeiasaun ba pozisaun ne’e haree ba kapasidade no méritu kandidatu nian no mos liu husi prosesu konsulta no proposta husi Diresaun-Jerál ba Asuntu ASEAN iha MNEK rasik.

Antes ne’e, iha ona Liaison Officer ida ne’ebé reprezenta Timor-Leste hodi ajuda fasilita komunikasaun ho Membru Estadu ASEAN no Sekretariadu ASEAN nian iha Jakarta. Haree ba momentu ne’ebé krítiku tebes iha Timor-Leste nia prosesu adezaun ba ASEAN, Governu Timor-Leste, liu husi MNEK, reativa fila fali pozisaun importante ne’e hodi bele ajuda fasilita komunikasaun no prosesu ba adezaun ne’ebé di’ak liután.

(KI MNEK)

HAKEREK NO HATÁN

Please enter your comment!
Please enter your name here