DILI, 19 setembru 2019 (TATOLI)-Ministériu Saúde (MS) hamutuk ho parseiru dezenvolvimentu sira hanesan OMS (Organizasaun Mundiál Saúde), UNICEF (United Nation International Children Fund) introdús vasina rotavirus ba diretór nasionál MS sira husi munisípiu 12 inklui RAEOA hodi kontrola moras iha Timor-Leste no mós rota virus atu haforsa no hadi’a liután kobertura programa imunizasaun rotina.

“Iha semináriu ne’e fó orientasaun tékniku ba ita-nia diretór munisípiu sira para oinsá mak atu implementa prosesu imunizasaun,” dehan Diretór Jerál Prestasaun Servisu, Horácio Sarmento ba jornalista sira iha salaun UNICEF, Caicoli, Dili, ohin.

Nia informa, agora vasina foun antes atu implementa iha redasaun tékniku sei halo semináriu liuliu ba responsavel programa sira no mós diretór munisipiu sira  para ba fahe tutan informasaun ne’e ba komunidade sira iha munisipiu.

“Depois orientasaun hotu sei lansa vasina foun iha tempu badak, sei halo vasinasaun ba ita-nia komunidade sira liuliu ba labarik tinan lima mai kraik,” nia informa.

Iha fatin hanesan reprezentante UNICEF, Denis Muhoza hateten, introdusaun vasina ne’e la’ós hanesan atividade separadu ida maibé ita tenke konsidera katak ita uza oportunidade introdusaun vasina atu reforsa imunizasaun rotina.

Nia dehan, ita iha parseiru barak ita koko serbisu hamutuk atu hasa’e kobertura imunizasaun no ita-nia servisu hamutuk ita bele koko hakas an atu nune’e labarik sira hetan sira nia direitu liuliu labarik ki’ik iha direitu atu hetan vasina.

Enkuantu, Reprezentante OMS, Mateus Cunha hateten: “Organizasaun Mundiál Saúde ho UNICEF kolabora hamutuk ho Ministériu Saúde oinsá vasina foun ne’e presiza treinamentu komunikasaun ne’e bele di’ak no implementasaun ne’e fó benefísiu di’ak ba ita-nia komunidade sira liuliu labarik sira.

Entretantu, semináriu ne’e realiza durante loron rua, hahú ohin no ramata iha aban no hetan partisipasaun husi diretór nasionál MS sira husi munisípiu 12 inklui RAEOA.

Jornalista : Felicidade Ximenes

Editór      : Rafy Belo

HAKEREK NO HATÁN

Please enter your comment!
Please enter your name here