Xefe Estadu Maiór Jenerál F-FDTL, Majór Jenerál Lere Anan Timur. Imajen/Antonio Goncalves

METINARO, 19 setembru 2019 (TATOLI)- Xefe Estadu Maiór Jenerál FALINTIL-Forsa Defeza Timor-Leste (F-FDTL), Majór Jenerál Lere Anan Timur, husu sosiedade sira atu labele obriga nia rezigna-an hodi husik Komandu F-FDTL iha tempu agora.

Notísia Relevante : FM husu Governu Diskute Ona Mandatu Lere no Falur

Lere dehan, ninia mandatu atu kontinua ou para ne’e kompeténsia Governu no Prezidente Repúblika, tanba nu’udar Timoroan nia sei nafatin iha espíritu nasionalizmu atu fó kontribuisaun hodi lidera nafatin Komandu F-FDTL.

“Ha’u sai ne’e la iha problema, maibé problema ne’e garante estabilidade nasionál ka lae? Ami maka harii nasaun ne’e, tanba ha’u nia mandatu tinan rua ate  Outubru 2020,” Lere hateten hodi responde jornalista sira iha Metinaro, Dili, ohin.

“Sira ONG hakarak ha’u sai ne’e razaun saida, uluk ami iha ai laran tinan 24 ema la ba bolu ha’u, agora ha’u atu komanda forsa mós la di’ak”.

Lere klarifika katak, foin lalais ne’e Prezidente Repúblika, Francisco Guterres Lú Olo extende ona nia mandatu too Outubru 2020, la’ós Outubru 2019.

Lere hatutan, deklarasaun ne’ebé fó sai husi ONG Fundasaun Mahein (FM) katak nia mandatu atu remata iha loron 6 Outubru 2019 ne’e laloos. Tanba iha loron 3 Agostu 2019 nia laran, Prezidente Repúblika, Francisco Guterres Lú Olo dekreta kontinuidade mandatu ba Majór Jenerál, Lere Anan Timur nu’udar Xefe Estadu Maiór Jenerál F-FDTL, liu husi Dekretu Prezidensiál ne’ebé publika iha 14 juñu 2019, série I, númeru 23 A, hahú sura husi 6 Outubru 2019. 

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here