Xefe Estadu Maiór Jenerál FALINTIL-FDTL, Majór Jenerál Lere Anan Timur Imajen/Eugénio Pereira

METINARO, 19 setembru 2019 (TATOLI)- Hanesan ema rezisténsia no sidadaun simples iha rai ida ne’e, Lere Anan Timur, la aseita ho desizaun polítiku sira iha Parlamentu Nasionál husi Bankada AMP blokeia Prezidente Repúblika (PR) , Francisco Guterres “Lú Olo” nia viajen ba Nasoins Unidas (ONU).

Notísia Relevante :  ONU Lamenta PN La Aprova Viajen PR

Xefe Estadu Maiór FALINTIL-Forsa Defeza Timor-Leste (F-FDTL), Majór Jenerál, Lere Anan Timur, hateten, Timor-Leste nu’udar nasaun membru ONU, tanba ne’e vizita Prezidente Repúblika nian ba ONU reprezenta Estadu atu diskute interese Estadu no povu Timor-Leste iha ONU iha Simeira Asaun Klimátika no Sesaun Asembleia Jerál ONU ba dala- 47  iha Nova Yorke.

 “La iha reprezentasaun prezidente dala rua ona ba ONU ne’e imajen ida aat, ita maka izola ita nia aan, no ema bele dehan ita estadu falladu ida, tanba ita rasik kastigu ita nia prezidente iha ita nia rai laran. Tanba sitasaun ne’e ladún favoravel ba sitasaun polítika, ekonomia no dezenvolvimentu,”  hateten Lere Anan Timur, ohin, ba jornalista iha Sentru Treinamentu F-FDTL, Metinaro, Dili.

Lere dehan, ohin loron Timor-Leste sai membru Komunidade Ko’alia Lian Portugés (CPLP) no sai membru g7+, haklaken dame no rekonsiliasaun no nasaun seluk ne’ebé hasoru krime polítika militár atu hetan dame, maibé iha Timor-Leste lider sira la koopera atu hakotu krize polítika iha rai laran.

Hanesan komandante FALINTIL  husu ba Komandante ein-Xefe FALINTIL atuál Prezidente partidu CNRT, Kay Rala Xanana Gusmão, Jenerál Taur Matan Ruak atuál prezidente PLP, Mari Alkatiri, lideransa másimu FRETILIN, José Ramos Horta no Francisco Guterres “Lú Olo” atu hametin sira nia unidade iha polítika hodi fó progresu ba Timor-Leste.

 Jornalista : Eugénio Pereira

Editór       : Francisco Simões

1 KOMENTÁRIU

HAKEREK NO HATÁN

Please enter your comment!
Please enter your name here