Ekonomista no Jurista, Manuel Tilman. Imajen doc Tatoli

DILI, 19 setembru 2019 (TATOLI) – Jusrista timoroan, Manuel Tilman, hateten Timor-Leste hanesan membru Organizasaun Nasaun Unida Unida (ONU), loloos Parlamentu Nasionál (PN), autoriza Prezidente Repúblika, Francisco Guterres ‘Lú Olo’ hodi partisipa Simeira Asaun Klimátika no Sesaun Asembleia Jerál ONU ba dala-74.

“La’ós Parlamentu Nasionál maibé deputadu sira hanesan membru partidu nian, divia ser ezerse sira-nia kna’ar tuir Konstituisaun haruka no labele impede fali nasaun tomak. Timor-Leste hanesan membru Organizasaun Nasaun Unida, espera ninia hanoin ho nia reprezentasaun, tanba ne’e Prezidente Repúblika mak bele reprezenta, maibé kuandu nia labele ba maka ita-nia embaixadór bele reprezenta”, tenik jurista ne’e ba Agência TATOLI iha otél Beach Garden, kinta ne’e.

Notísia Relevante: PN La Autoriza PR Lú Olo Ba Nova Iorke

Tuir ajenda ne’ebé iha, Simeira Asaun Klimátika ne’e realiza iha loron 23 setembru no Asembleia Jerál ONU nian hahú iha loron 24 to’o 30 setembru 2019.

Nune’e, iha loron 16 setembru, PN halo diskusaun ba dezlokasaun Xefe Estadu ba estranjeiru, maibé bainhira iha votasaun maioria vota kontra ho razaun tenke rezolve membru governu indijitadu ne’ebé seidauk fó pose, nune’e rezultadu votasaun a-favór 20, kontra 27 no abstensaun 1, tanba ne’e viajen PR Lú Olo kanseladu.

Nia dehan, Ministériu Negósiu Estranjeiru no Kooperasaun (MNEK) no delegasaun partisipa iha reuniaun altu nível hanesan alternativa.

“Konstituisaun la dehan MNEK mak reprezenta. Deputadu sira lee didi’ak Konstituisaun, reprezenta Estadu hanesan membru ONU ne’e Prezidente Repúblika, la’ós Ministru Negósiu Estranjeiru no Kooperasaun”, nia akresenta.

Tuir eis deputadu ne’e, Ministru Negósiu Estranjeiru no Kooperasaun ezerse ezekusaun lori Governu nia naran.

“Kuandu ita iha funu ruma ka dezastre boot ruma mak halo ema barak mate, entaun Prezidente Repúblika bele la ba, tanba obrigasaun ne’e aas liu. Tanba ne’e, embaixadór labele foti fali desizaun ne’ebé kompete ba Prezidente Repúblika nian”, hateten Manuel Tilman.

Nia observa, kestaun impase polítika bele rezolve iha nasaun laran la’ós lori fali ONU, no  to’o agora deputadu balun iha PN kansela viajen PR nian dala-haat ona, tanba ne’e partidu polítika ne’ebé tuur iha Parlamentu mak responsabiliza.

“Iha eleisaun tuir mai ne’e povu mak sei julga, sira ne’ebé impede malu no deputadu sira ne’ebé ko’alia la tuir Konstituisaun”, nia subliña.

Antes ne’e, iha loron 18 setembru 2018, liuhosi sesan plenária PN kansela ona dezlokasaun Xefe Estadu ba konvite hosi Sekretáriu Jerál ONU, António Guterres hodi partisipa  Sesaun Asembleia Jerál ONU ba dala-73 no mós atividade oioin hosi sesaun ne’e, hanesan Simeira Dame Nélson Mandela no enkontru bilaterál seluk tan.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here